Nurtóre Júsip Býrabaıdaǵy qoqys týraly: Tazalyq ulttyq qundylyqpen teń bolýy tıis
NUR-SULTAN. QazAqparat – Parlament Senatynyń depýtaty Nurtóre Júsip demalys oryndarynda shashylǵan qoqys máselesin kóterip, tazalyq tártibin jolǵa qoıýýdy surap, Úkimet basshysyna depýtattyq saýal joldady, dep habarlaıdy QazAqparat tilshisi.
«Býrabaıdyń bir óziniń Shveıtsarııadan nesi kem? Osy Býrabaıdyń jalpyulttyq kýrort atanǵanyna bıyl 100 jyl tolady. 100 jyldyq tarıhynda talaı qurylymdyq ózgerister boldy. 2000 jyly Qazaqstan Úkimeti óz qaýlysymen «Býrabaı» memlekettik-ulttyq parki degen mekeme qurdy. Qazir «Býrabaı» Qazaqstan Prezıdenti Іs basqarmasynyń qaraýyna qaraıdy», - dedi Nurtóre Júsip Parlament Senatynyń otyrysynda.
Depýtattyń aıtýynsha, osy Býrabaıda qaptaǵan qoqys, shashylǵan zattar, plastıkalyq bótelke, ýmajdalǵan paket, kóldiń las sýy – onyń kórkin ketirip tur.
«Qandaı keremet demalys aımaǵy! Biraq qadirin nege bilmeımiz? Memlekettik-ulttyq tabıǵı parktiń tazalyqqa jaýapty tıisti bólimderi men qurylymdary da bar. Biraq qoqystan aıaq alyp júre almaıtyn jaǵdaıǵa jettik. Býrabaıda demalýshylar tastaǵan qoqystar týraly áleýmettik jelide taralǵan beınerolık sonyń dáleli. Bul qalaı? Jalpy, tek Býrabaı emes, Qazaqstannyń kez kelgen óńirine barsaq, ne kóp – qoqys kóp. Tastaıtyn da ózimiz, lastaıtyn da ózimiz. «Týǵan tabıǵatymyzdy aıalap, kúte almaıtyndaı basymyzǵa ne kún týdy? Sonshama lastaıtyndaı, sonshama qorlaıtyndaı týǵan jerimizdiń ne jazyǵy bar?» degen suraq týady. Jer bizdiki! El bizdiki! Qazaqstanǵa shetelden oralǵan qandas aqsaqalymyzdyń biri ushaqtan túse salyp, qara jerdi súıgen sáti esterińizde bar ma? Týǵan jerge degen osyndaı ińkárlik qazir nege joq bizde?», - deıdi depýtat.
Senator qazaq halqy osy eldegi, jerdegi bárine de jaýapty ult ekenin atap ótti.
«Tabıǵatty taza ustaý úshin janymyzdy taza ustaıyq. Tazalyq mádenıetin qalyptastyraıyq. Dalamyz da, qalamyz da taza bolsyn. Týǵan jerimizdi anamyzdaı ardaqtaý – ózimizge baılanysty emes pe!? Ulttyq namysymyz qaıda? El bolýǵa ultaraqtaı jer tappaı júrgen qanshama jurt bar álemde. Biz bardyń qadirin nege bilmeımiz?» - dedi senator.
Osy máseleni tize kele Nurtóre Júsip bul rette Kanadanyń tártibin basshylyqqa alý kerektigin jetkizdi. Ol elde ekologııalyq talaptar qatań saqtalady. Kanadada «Jasyl jospar» degen ulttyq baǵdarlama qabyldanǵan.
«Tazalyq máselesin ulttyq qundylyqtar qataryna shyǵarý kerek. Memlekettik turǵyda shuǵyl túrde tazalyqty saqtaý, baqylaý, retteý tetikterin jetildirý qajettigi bilinip otyr. Sizden osy máseleni qarap, Úkimettiń tıisti qurylymdary arqyly is-sharalar keshenin jedel qabyldaýdy suraımyz», - dedi Nurtóre Júsip.
