Nurtóre Júsip balalar kardıohırýrgteriniń jetispeýshiligi máselesin kóterdi
NUR-SULTAN. QazAqparat - Senator Nurtóre Júsip mamandar tapshylyǵynan zardap shegip otyrǵan balalar kardıohırýrgııasy salasyna qatysty sheshimin tappaǵan birqatar ózekti máseleni kóterdi, dep habarlaıdy QazAqparat tilshisi.
Depýtattyń aıtýynsha, júrek reanımatsııasy men qarqyndy terapııa bólimindegi naýqastarda dári-dármekter, atap aıtqanda qosymsha antıbıotıkter, ımmýndyq jáne basqa dáriler, sondaı-aq qymbat MRT apparattary jetispeıdi.
«Qazirgi ýaqytta 7 qaladaǵy kardıohırýrgııalyq 10 ortalyqta balalardyń júrek aqaýyna operatsııa jasaý múmkindigi bar. 2020 jyly 18 jasqa deıingi balalar arasynda ashyq júrekke - 1627, onyń ishinde 1 jasqa deıingi - 1128 balaǵa, 271 nárestege operatsııa jasalǵan. Operatsııa jasaý barysynda hırýrgter kóp jaǵdaıda shuǵyl sheshim qabyldaıdy. Al bul – úlken jaýapkershilik. Jalaqysy tómen, jaýapkershiligi joǵary bolǵan soń jas kardıohırýrgter bul mamandyq boıynsha turaqtap istemeıdi», - dedi Nurtóre Júsip Úkimet basshysynyń atyna joldaǵan depýtattyq saýalynda.
Senator elimizde balalar arıtmologtary, balalar kardıohırýrgi, perfýzıolog mamandarynyń jetispeıtinin atap ótti. Ol osy mamandyqtardyń mártebesin, sonymen birge jalaqysyn kóterý qajet dep otyr.
Depýtattyń sózine qaraǵanda, kepildendirilgen medıtsınalyq kómek aıasynda kórsetiletin qyzmetterge tarıftik saıasatty qaıta qaraý mańyzdy.
Nurtóre Júsip jetispeı otyrǵan medıtsınalyq kadrlardy daıarlaý máselelerin jedel sheshý, halyqaralyq master-klastar ótkizý jáne ozyq elderdiń tájirıbesinen sabaq alý qajet dep qosty. Materıaldyq-tehnıkalyq bazany nyǵaıtý jáne klınıkalardy qamtamasyz etý, logıstıkany jaqsartý jáne dıagnostıka men emdeýdiń klınıkalyq praktıkasyna zamanaýı medıtsınalyq tehnologııalardy engizýdi jedeldetý mańyzdy.
