Nurtileý Imanǵalıuly televızııada ózindik qoltańbasyn qaldyrdy - Nurlan Nyǵmatýlın

NUR-SULTAN. QazAqparat - Májilis tóraǵasy Nurlan Nyǵmatýlın qazaq televızııasynyń maıtalmany, halqymyzdyń qadirli uly, tanymal tulǵa Nurtileý Imanǵalıulynyń qaıtys bolýyna baılanysty marqumnyń otbasyna kóńil aıtý jedelhatyn joldady, dep habarlaıdy QazAqparat.

Májilis tóraǵasy bul - qazaqstandyqtar úshin, qoǵam úshin, qazaq televızııasy úshin orny tolmas aýyr qaza ekenin aıtty.

«Nurtileý Imanǵalıuly ultyn, elin, jerin qurmettegen úlken júregimen, sanaly ǵumyryn egemen elimizdiń ıgiligine arnady. Maǵynasy tereń, jaýapkershiligi zor kóptegen salmaqty baǵdarlamalardy asqan sheberlikpen júrgizip, ózekti suraqtardyń sheshimin tabýyna ólsheýsiz úles qosty. Televızııa salasynda ózindik qoltańbasyn qalyptastyryp, myńdaǵan shákirtter tárbıelep, artynda óshpes iz qaldyrdy» delingen jedelhatta.

Palata spıkeri asyl azamattyń aqjarqyn beınesi halyqtyń júreginde máńgi saqtalatynyn atap ótti.

Eske sala keteıik, biz búgin qazaq televızııasynyń ardageri Nurtileý Imanǵalıulynyń dúnıeden ótkenin jazǵan bolatynbyz.