Nurtileý Imanǵalıuly atyndaǵy stıpendııaǵa baıqaý jarııalandy

NUR-SULTAN. QazAqparat – «Qazaqstan» teleradıokorporatsııasy qazaqstandyq joǵary oqý oryndaryndaǵy jýrnalıstıka fakýltetiniń II, III, IV kýrs stýdentteri arasynda Qazaq televızııasynyń ardageri Nurtileý Imanǵalıuly atyndaǵy stıpendııaǵa baıqaý jarııalady, dep habarlaıdy QazAqparat tilshisi.

«Nurtileý Imanǵalıuly – óziniń efırdegi úlgisimen Qazaq televızııasynyń tutas bir býynyn tárbıelegen tulǵa. Bizdiń maqsatymyz – osy sabaqtastyqty jalǵaý, televızııada Nurtileý Imanǵalıulynyń izbasarlaryn daıyndaý, esimi men shyǵarmashylyǵyn keńinen nasıhattaý. Ekinshiden, bul bolashaq jýrnalısterdiń shyǵarmashylyq sheberligin shyńdaýǵa kórsetken qoldaýymyz», - deıdi «Qazaqstan» RTRK» AQ Basqarma tóraǵasy Lázzat Tanysbaı.

Úmitker N.Imanǵalıulynyń televızııadaǵy tulǵasy jaıly beınematerıal ázirleýi tıis. Materıaldar qazaq tilinde qabyldanady. Grant ıegerlerin (eki jeńimpaz) «Qazaqstan» teleradıokorporatsııasynyń qyzmetkerlerinen quralǵan arnaıy komıssııa anyqtaıdy.

Stıpendııa ár jeńimpazǵa 2021-2022 oqý jylyna beriledi. Jumystar 2021 jylǵy 28 maýsym – 28 tamyz aralyǵynda [e-mail] elektrondy poshtasy arqyly qabyldanady.