Nurtileý Imanǵalıuly atyndaǵy stıpendııa ıegerleri anyqtaldy
Korporatsııa málimetinshe, baıqaý elimizdegi joǵary oqý oryndarynyń jýrnalıstıka fakýltetiniń stýdentteri arasynda eki aı kóleminde júrgizildi. Oqý granty N.Imanǵalıulynyń televızııadaǵy tulǵasy jaıly úzdik beınematerıal usynǵan úsh stýdentke tabystaldy.
Basqarma tóraıymy Lázzat Tanysbaı baıqaýdyń maqsaty – Qazaq televızııasy qalyptasa bastaǵan ýaqyttan teleefırdegi beınesimen tutas býynǵa úlgi bolǵan Nurtileý Imanǵalıulynyń esimi men shyǵarmashylyǵyn nasıhattaý, izbasarlaryna qoldaý kórsetý ekenin atap ótti.
«Oqý granty bastapqyda eki stýdentke belgilengen. Kelip túsken jumystar arasynda Nurtileý Imanǵalıulynyń shyǵarmashylyǵyn, telejúrgizýshi, tulǵa retindegi erekshelikterin ózgeshe qyrynan ashyp kórsetken stýdentter boldy. Beınematerıaldardy qarastyra otyryp, taǵy bir úmitkerdiń jumysyn úzdik dep tanyp, qosymsha grant berý týraly sheshim qabyldadyq», - dedi L.Tanysbaı.
Teleradıokorporatsııa qyzmetkerlerinen qurylǵan arnaıy komıssııanyń sheshimimen Almaty qalasyndaǵy Halyqaralyq aqparattyq tehnologııalar ýnıversıtetiniń 3-kýrs stýdenti Ańsaǵan Ǵalaladın, M.Áýezov atyndaǵy Ońtústik Qazaqstan ýnıversıtetiniń 2-kýrs stýdenti Qanat Joldasbekov, S.Amanjolov atyndaǵy Shyǵys Qazaqstan ýnıversıtetiniń 4-kýrs stýdenti Kúmisjan Isan Nurtileý Imanǵalıuly atyndaǵy oqý grantynyń ıegeri atandy.
50 myń teńge kólemindegi aı saıynǵy stıpendııa stýdentterge bıylǵy oqý jylyna tólenedi.
