Nurtaı Sabılıanov: Óńirlerde energetıkalyq ınfraqurylymnyń 70-80%-y tozǵan

ASTANA. KAZINFORM — Jańadan qabyldanǵan ulttyq jobaǵa saı, aldaǵy ýaqytta elimizdegi energetıkalyq ınfraqurylym nysandary jóndeýden ótpek. Bul jóninde QR Parlamenti Májilisiniń depýtaty, Ekonomıkalyq reforma jáne óńirlik damý komıtetiniń tóraǵasy Nurtaı Sabılıanov «Jibek Joly» telearnasynyń «Ýáde» baǵdarlamasynda málimdedi.

— Memlekette energetıkalyq ınfraqurylymdy jáne kommýnaldyq sektordy jańǵyrtýǵa baılanysty ulttyq joba qabyldandy. Osyǵan baılanysty zańdarǵa ózgerister engizdik. Bıyldan bastap kommýnaldyq sektor men energetıkalyq ınfraqurylymdy jańǵyrtýǵa, jóndeýge qarajat bólinedi. Qarajat qalaı bólinetinin, qalaı júzege asatynyn biz zań arqyly rettep otyrmyz, — dedi depýtat.

Sondaı-aq ol atalǵan maqsatta bólingen trıllıondaǵan qarajattyń tıimdi jumsalýy baqylanatynyn atap ótti.

Odan bólek N. Sabılıanov Semeıdegi energetıkalyq ınfraqurylymnyń jaǵdaıyna toqtaldy.

— Semeıde 21 qazandyq, 1 jylý elektr ortalyǵy bar. Sol arqyly qala ǵımarattary jylytylady. Qarajat ýaqytynda bólinip jatyr. Jobalyq-smetalyq qujattar jasalǵan. Olarǵa respýblıkalyq bıýdjetten qarajat bergizdik. Jumystar júrip jatyr. Biraq áli de tozyǵy jetken qazandyqtar, ábden eskirgen qubyrlar men qural-jabdyqtar bar. Osylardy ret-retimen jóndep, aýystyrýymyz kerek, — dedi ol.

Aıta keteıik buǵan deıin Premer-mınıstr Astananyń energetıkalyq ınfraqurylymyn teksergenin jazǵanbyz.