Nurtaı Sabılıanov áýe kóligi salasyndaǵy máselelerdi atady

ASTANA. KAZINFORM – Májilistegi eldiń kólik-logıstıkalyq áleýetin damytýǵa arnalǵan Úkimet saǵatynda depýtat Nurtaı Sabılıanov áýe kóligi salasyndaǵy máselelerdi atady.

- Áýe kóligi salasynda mynadaı máseleler bar: áýejaı jabdyqtarynyń, tehnıkalyq quraldary men ınfraqurylymynyń eskirýi; avıaotyn qunynyń joǵary bolýy; tıimsiz josparlaý; ushaqtardyń jetispeýshiligi. Bul máselelerdi depýtattar jıi kóterýde. Ásirese, Air Astana men FlyArystan-nyń jıi keshigýi, bılet qunyn qaıtarýda tutynýshylar quqyǵynyń buzylýy únemi bolyp jatyr. Sondyqtan osyndaı máselelerge mınıstrlik tarapynan shara qoldanylýy kerek, - dedi Nurtaı Sabılıanov.

Onyń atap ótýinshe, depýtattar elimizdiń kólik-logıstıka áleýetin damytý máselelerin birneshe márte kótergen.

 - Úkimet pen jergilikti atqarýshy organdardyń atqaryp otyrǵan sharýasyn kórip otyrmyz. Alaıda qazirgi jaǵdaıda bul jetkiliksiz bolyp tur. Keshendi tásil jáne syndarly vedomstvoaralyq ózara is-qımyl qajet. Tek jumyla jumys istegen kezde ǵana sapaly ınfraqurylym quryp, osy baǵytqa salynǵan ınvestıtsııanyń tıimdiligin qamtamasyz ete alamyz, - dedi Májilis depýtaty.

Buǵan deıin ártúrli kólik túrleriniń tehnologııalyq birtutastyǵyn qamtamasyz etetin kólik-logıstıka ortalyqtaryn qurý qajettigin jazǵan edik.