Nurtaı Sabılıanov jol sapasyna teris áser etken negizgi sebepterdi atady
ASTANA. QazAqparat - Parlament Májilisiniń depýtaty Nurtaı Sabılıanov joldarda júkteri shamadan tys tıelgen kólikterdi qadaǵalaýǵa alýdy surady, dep habarlaıdy QazAqparat.
«Tender ótkizý rásiminiń ashyq emestigi, merdigerlerdiń adal bolmaýy, deldaldar - qosalqy merdigerlerdiń kóptigi, sapasyz qurylys materıaldarynyń qoldanylýy avtomobıl joldarynyń sapasyz salynýyna sebep bolyp otyr. Mysaly, 2016 jyly «Boǵas - Qaraǵandy» respýblıkalyq mańyzy bar jolynyń «Tarbaǵataı - Aıagóz» ýchaskesine ortasha jóndeý júrgizý kezinde birneshe merdiger tartylǵan, olardyń árqaısysy asfaltty ártúrli tásilmen tósegen. Nátıjesinde, jol sapasyz salynǵan jáne qazirdiń ózinde buzylyp jatyr. Sonda jol-qurylys jumystarynyń sapasyn bes qadamdyq baqylaý júıesiniń nátıjesi qaıda? Merdigerlerdiń paıda bolǵan aqaýlardy joıýǵa bergen kepildikteri qaıda?», - dedi depýtat.
Onyń sózine qaraǵanda, atalǵan máseleler qazir Parlamentte qarastyrylyp jatqan tıisti zań jobasyn qabyldaǵannan keıin, «QazAvtoJol» aktsıonerlik qoǵamy kvazımemlekettik sektor sýbektileriniń satyp alý týraly zańnamany tolyq kólemde saqtaǵan jaǵdaıda sheshilýi múmkin.
Budan bólek ol júkti shamadan tys tıep júrgen kólikter máselesine toqtaldy.
«2017 jyly kólik quraldarynyń salmaqtyq jáne gabarıttik parametrlerindegi quqyq buzýshylyqtardy tirkeýge arnalǵan, AAÓQ (SAIS) dep atalatyn arnaıy avtomattandyrylǵan ólsheý quraldarynyń 18 birligin iske qosý belgilengenimen, is júzinde 3 birligi engizildi. Budan basqa, 2013 jyly paıdalanýǵa berilgen 12 ólsheý quraly (AAÓQ) negizgi halyqaralyq avtomobıl dálizderinde áli kúnge deıin paıdalanylmaı otyr. Mundaı ólsheý júıeleriniń bolmaýy júk avtokóligine oske júktemeni arttyrýǵa múmkin beredi. Máselen, 2015-2017 jyldar kezeńinde júk tıeıtin avtokólik quraldarynyń salmaqtyq jáne kólemdik parametrlerinen asyp ketkeni úshin 23 145 ákimshilik quqyq buzýshylyq tirkeldi. Bul salynǵan avtojoldardyń jekelegen ýchaskeleriniń merziminen buryn buzylýyna ákep soǵady jáne qozǵalystyń qaýipsizdigine keri áser etedi. Buǵan jol berýge bolmaıdy», - dedi N. Sabılıanov.
