Nurtaı Sabılıanov turǵyn úı qurylysy júrgizilmegen aýdandar týraly aıtty
«Ýákiletti organ bergen derekterge súıensek, búgingi kúni 512 myń azamat turǵyn úı alý kezeginde tur, onyń ishinde 30 myńǵa jýyǵy bul kezekte turǵanyna 10 jyldan astam ýaqyt bolǵan. Úı kezegińde turǵan 200 myńnan astam azamat halyqtyń áleýmettik jaǵynan álsiz tobyna jatady», - dedi depýtat Parlament Májilisinde «Nurly jer» baǵdarlamasynyń júzege asyrylýyna arnalǵan Úkimet saǵatynda.
Onyń sózine qaraǵanda, 2017 jyldan 2019 jylǵy 1 shildege deıin, ıaǵnı 2,5 jyl ishinde 30 myń azamat turǵyn úı alǵan, bul kezekte turǵan jalpy adam sanynyń 6,3 paıyzy ǵana. Mysaly, osy merzimde turǵyn úı kezeginde turǵan Almaty qalasy boıynsha 8 myń adamǵa (37 %), Túrkistan oblysy – 4 myń adamǵa (13,5 %), Qyzylorda oblysy – 3300 adamǵa (12 %) páter berildi, al Atyraý oblysynda bar joǵy 720 adam, ShQO – 855 adamǵa páter berilgen.
«Bul halyqty turǵyn úımen qamtamasyz etý boıynsha qosymsha sharalar qabyldaý qajet ekenin aıǵaqtaıdy. Birinshiden, muqtaj azamattardyń turǵyn úımen jetkilikti túrde qamtylmaý máselesine toqtalǵan jón. Bıýdjet qarajatyn óńirlerdiń qajettilikteri men kezekte turǵan muqtaj adamdardy eskermeı bólý praktıkasy jalǵasyp otyr. Kezekte turǵan adamdardyń sany eń kóp Almaty oblysynda 48 myńnan astam azamat kezekte tur. Bul rette sońǵy úsh jylda oǵan bar bolǵany 18,7 mlrd teńge ǵana bólingen. Al kezekte turǵan adamdar sany odan eki esedeı az (26 myń adam) Qostanaı oblysyna memlekettik bıýdjetten 26,8 mlrd teńge bólingen. 35 myń adam kezekte turǵan Qaraǵandy oblysyna 19,5 mlrd teńge qarjy bólingen», - dedi N. Sabılıanov.
Sonymen qatar, osy baǵdarlama boıynsha shaǵyn, monoqalalarda, aýdan ortalyqtary men aýyldarda jeke turǵyn úıler salý qarqyny baıaý júrgizilýde. Búgingi tańda shaǵyn, monoqalalar men aýdandarda kezekte turǵandar sany 210 myń adam. 2,5 jyl ishinde olarda barlyǵy 188 úı (5 myń páter) salynǵan.
«Onyń ústine sońǵy bes jylda bıýdjet qarajaty esebinen birde-bir turǵyn úı salynbaǵan aýdandar da bar. Mysaly, Túrkistan oblysynyń Saryaǵash aýdanynda 4 myńǵa jýyq azamat kezekte tur. Biraq sońǵy 10 jylda bul aýdanda turǵyn úı salynbaǵan jáne kezekte turǵan tek 36 adam ǵana turǵyn úı alǵan. Aqmola oblysynyń Shortandy aýdanynda 600 adam kezekte tursa da, 2013 jyldan beri onda turǵyn úı múldem berilmegen. Shyǵys Qazaqstan oblysynyń Aıagóz qalasynda 1 myńǵa jýyq adam kezekte tur. Biraq sońǵy 25 jylda bul qalada birde-bir kóppáterli jańa turǵyn úı salynbaǵan. Ókinishke qaraı, mundaı jaǵdaı basqa kóptegen aýdandarda da bar», - dedi depýtat.
Onyń paıymynsha, ýákiletti organ men ákimdikter shaǵyn monoqalalar men aýyldarda turǵyn úı salýǵa da erekshe nazar aýdaryp, osy maqsatqa arnap jergilikti bıýdjetten qarajat qarastyrýy qajet.
