Nurtaı Sabılıanov Semeı polıgonynan zardap shekkender problemasyn kóterdi
«Abaı oblysynyń turǵyndarymen kezdesýler kezinde Semeı polıgonynda 40 jyl boıy júrgizilgen ıadrolyq synaqtardyń saldarynan zardap shekken azamattardy áleýmettik qorǵaýdy jetildirýge baılanysty máseleler jıi kóterildi. Birinshiden, zeınetaqyǵa ústemeaqy alý quqyǵy eń joǵary radıatsııalyq qaýipti aımaqtarda turyp jatqandarǵa jáne 1998 jylǵy 1 qańtarǵa deıin zeınetke shyqqandarǵa berilgen. Al radıatsııadan zardap shege turyp, basqa aımaqtarǵa kóship ketken jáne zeınetke 1998 jylǵy 1 qańtardan keıin shyqqandarda bundaı quqyq joq», - dedi N. Sabılıanov Májilistiń jalpy otyrysynda Úkimet basshysy Álıhan Smaıylovqa joldaǵan saýalynda.
Onyń aıtýynsha, polıgonnan zardap shekkenderdiń barlyǵy keshendi medıtsınalyq tekseristen ýaqytyly ótpegen. Olardy jeke esepke alý isi tolyq júrgizilmegen. Kópshiligi ońaltý ortalyqtaryna bara almaı otyr.
«Polıgonnan zardap shekken azamattardyń zeınetke shyǵý jasyn tómendetý – mańyzdy máselelerdiń biri. Halyq áıelderdi 58 jastan zeınetke shyǵarýdy talap etip jatyr. Sonymen qatar, zardap shekken azamattardyń kópshiliginiń turaqty jumys orny joq. Olar mindetti medıtsınalyq saqtandyrý jarnalaryn tóleı almaıdy», - dedi depýtat.
Bul aıtylǵandardyń negizinde N. Sabılıanov myna máselelerdi qarastyrýdy surady:
- ıadrolyq synaqtardyń saldarynan zardap shekken azamattardy mindetti medıtsınalyq saqtandyrý jarnalaryn memleket atynan júzege asyrý;
- zardap shekken azamattarǵa beriletin ústemeaqylardyń barlyq túrlerin eki esege ulǵaıtý jáne jyl saıynǵy qosymsha eńbek demalysyna aqy tóleýge memlekettik qoldaý kórsetý.
