Nurtaı Sabılıanov Eljan Birtanovtyń baıandamasyna oraı: Mınıstr ertegi aıtqandaı boldy
ASTANA. QazAqparat - Búgin QR Parlamenti Májilisinde densaýlyq saqtaý salasyn tsıfrlandyrý taqyrybynda ótken Úkimet saǵatynda depýtat Nurtaı Sabılıanov aýdandyq, aýyldyq eldi mekenderdegi densaýlyq saqtaý uıymdaryndaǵy naqty problemalardy kóterdi, dep habarlaıdy QazAqparat.
«Mınıstrdiń baıandamasyn tyńdadyq. Maǵan mınıstr ertegi aıtyp jatqan sııaqty boldy. Nege? Óıtkeni, tsıfrlandyrý bolý úshin densaýlyq saqtaý uıymdaryn, aýrýhanalardy, emhanalardy biz jaqsy, joǵary Internet baılanysyna qosýymyz kerek. Aqparat jáne kommýnıkatsııalar mınıstrliginiń dereginshe, ol 2022 jyly ǵana júzege asady, qarajat bolsa. Sonda bul tsıfrlandyrý kimge júrgiziledi? Mysaly óńirlerdi alyp qaraıtyn bolsaq, Soltústik Qazaqstan, Aqmola, Qostanaı, Aqtóbe, Shyǵys Qazaqstan, Qaraǵandy, Ońtústik Qazaqstan oblystarynyń densaýlyq saqtaý uıymdary bar-joǵy 14 pen 43 paıyz deńgeıinde ǵana Internet jelisine qosylǵan eken. Sondyqtan birinshi kezekte osyny sheshýimiz kerek. Qurmetti mınıstr! Sizge aıtarym aspanǵa qarap, juldyzdy sanaǵannan góri jerdegi tirshilikke durys kózben qaraǵan jón sekildi», - dedi depýtat atalǵan másele boıynsha baıandama jasaǵan Densaýlyq saqtaý mınıstri Eljan Birtanovqa qarata.
Óıtkeni, depýtattyń aıtýynsha, eldi mekenderdi aralaǵan kezde densaýlyq saqtaý salasyna baılanysty kóptegen máseleler kóterilgen. Máselen, aýdandardaǵy, aýyldardaǵy medıtsınalyq mekemelerdi jańa jedel járdem kóliktermen qamtamasyz etý qajet. Elimizde 2124 jedel járdem kóligi bolsa sonyń 770-si eskirgen. 20-shy ǵasyrda shyǵarylǵan kólikter de bar.
«Endi oılap qarańyz, qatty aıazda, boranda eski kólikpen aýrýlardy alyp kele jatqanda buzylyp qalsa ne bolmaq? Osy jaǵyna nege kóńil aýdarmaısyzdar?. Sizder atqarýshy organ, ákimder alyp berýi kerek deısizder. Biraq qarajatty báribir de respýblıkalyq bıýdjetten bólý kerek. Sonda ǵana biz durys medıtsınalyq kómek kórsete alamyz», - dedi ol.
Sonymen qatar ol aýrýhanalar men emhanalardyń jaǵdaıyn da kóterdi.
«Halyqqa qolaıly jaǵdaı jasalmaǵan, eski, tozǵan, jóndeý jumystary júrgizilmegen. Atap aıtar bolsam, ShQO, Jarma aýdanynyń ortalyǵy Qalbataý aýylyndaǵy aýrýhananyń jóndelmegenine 25 jyl bolypty. Úrjar aýdanynyń ortalyǵynda emhana joq. Úsh dárigerlik ambýlatorııa qyzmet kórsetedi. Onyń óziniń biriniń ǵımaratyn alyp alǵansyzdar. Osyndaı máseleler qaı ýaqytta sheshiledi? Zaısan aýdany, elimizdiń shekarasynyń shetindegi aýdan. Ótken joly baryp emhanasyn kórdim, tar, burynǵy balabaqsha ǵımaratynda ornalasqan. Іshinde ne sýy joq, káriz júıesi joq. Adamdar turyp tur, sheshinetin jeri de joq. Osydan keıin medıtsınalyq kómektiń joǵary deńgeıde ekendigin qalaı aıtýǵa bolady? Osy máselelerdi sheshetin ýaqyt boldy ǵoı», - dedi Nurtaı Sabılıanov.
Depýtat aýdandardaǵy, aýyldardaǵy kadr tapshylyǵyna da erekshe toqtaldy.
