Nurtaı Sabılıanov: Áýejaıdyń atyn ózgertý qaýlysy ýaqtyly shyǵarylyp otyr
ASTANA. QazAqparat - Astana áýejaıy Nursultan Nazarbaevtyń esimin berý týraly sheshim ýaqytynda jasalyp otyr. Búgin Májilistiń jalpy otyrysynan keıin tilshilerge bergen suhbatynda depýtat Nurtaı Sabılıanov osyndaı pikir bildirdi, dep habarlaıdy QazAqparat.
«Astana halyqaralyq áýejaıyna Elbasymyz Nursultan Nazarbaevtyń esimin berý týraly Úkimettiń qaýlysyn óte durys dep oılaımyn. Atap aıtqanda, ýaqytynda shyǵarylǵan qaýly. Óıtkeni Nursultan Ábishuly Qazaqstandy órkendetýge orasan zor úles qosyp otyr. Elbasy Táýelsizdigimizdi tuǵyrly qylyp, elimizdi órkendetip, halyqtyq bereke-birligin oılap, árqashan da elimizdi eń damyǵan 30 memleketterdiń qataryna qosýǵa atsalysyp júrgen álemdik deńgeıdegi úlken tulǵa. Sondyqtan osy sheshimdi bári de qoldaıdy dep oılaımyn»,-dep toqtaldy N. Sabılıanov.
Osy oraıda ol álemdik tájirıbede áýejaılarǵa sol eldi basqarǵan basshysynyń, tulǵanyń, memleketti órkendetken azamattyń atyn berý úrdisi bar ekenin eske salyp ótti.
«Álemde 30-dan astam elde memleket jáne úkimet basshylarynyń esimderi halyqaralyq áýejaılarǵa qoıylǵan. Sondyqtan elimizde jasalyp otyrǵan sheshim halyqtyń qurmeti bolýy kerek»,-dedi depýtat.
Budan buryn habarlanǵandaı , Astana áýejaıy «Nursultan Nazarbaev halyqaralyq áýejaıy» bolyp ataldy.
