Nurtas Káripbaev Týrızm ındýstrııasy komıtetiniń tóraǵasy qyzmetinen bosatyldy
ASTANA. KAZINFORM – Nurtas Káripbaev Qazaqstan Týrızm jáne sport mınıstrligi Týrızm ındýstrııasy komıtetiniń tóraǵasy qyzmetinen bosatyldy. Bul týraly Úkimettiń baspasóz qyzmeti habarlady.
– Qazaqstan Respýblıkasy Týrızm jáne sport mınıstriniń buıryǵymen Nurtas Ǵalymuly Káripbaev basqa jumysqa aýysýyna baılanysty Týrızm ındýstrııasy komıtetiniń tóraǵasy qyzmetinen bosatyldy, - delingen habarlamada.
Ol bul qyzmetke 2024 jyly taǵaıyndalǵan.
Nurtas Káripbaev 1986 jyly 20 qarashada Qaraǵandy qalasynda dúnıege kelgen.
E.A.Bóketov atyndaǵy Qaraǵandy memlekettik ýnıversıtetin, «Bolashaq» baǵdarlamasy boıynsha Ulybrıtanııadaǵy Sheffıld ýnıversıtetin bitirgen.
Qaraǵandy oblysynyń ekonomıka jáne bıýdjettik josparlaý basqarmasy memlekettik mekemesiniń bas mamany, Qaraǵandy oblysy ákiminiń apparaty memlekettik mekemesiniń bas mamany, Qaraǵandy oblysynyń densaýlyq saqtaý basqarmasy jáne Qaraǵandy oblysynyń kásipkerlik basqarmasy memlekettik mekemelerinde basshylyq laýazymdarda qyzmet atqarǵan.
2022-2024 jyldary Qazaqstan Mádenıet jáne sport mınıstrliginiń Týrızm ındýstrııasy komıteti tóraǵasynyń orynbasary boldy.