Nurtas Adambaı «Taraz» fılminiń túsirilimine $400 myń jumsady
ALMATY. QazAqparat - Almatyda qazaqstandyq kınorejısser Nurtas Adambaıdyń «Taraz» atty krımınaldyq dramasynyń jabyq kórsetilimi ótti, dep habarlaıdy QazAqparat.
«Taraz» fılmi bala kezinen taı-qulyndaı tebisip, birge ósken Asan, Aıdar jáne Sapar esimdi dostardyń ómir joly týraly baıandaıdy. Oqıǵa Qazaqstannyń eń bir krımınaldy qalalarynyń biri - «Tarazda» bolǵan oqıǵadan bastalady. Adambaı buryn mundaı týyndylar jasaýmen aınalyspaǵan. Sol sebepti avtor fılmdi qolǵa alýdyń keregi bar ma, joq pa, degen másele tóńireginde kóp oılanǵan.
Rejısser fılmdi ózi daıyndaǵan jáne onda basty rólderdiń birin oınaıdy. Týyndyda zorlyq-zombylyq áreketteri óte kóp. Sol sebepti onyń keıbir dýblderin birneshe márte túsirý qajet bolǵan.
«Túsirý alańynda adamdardy kádimgideı uryp-soǵyp, býyndyryp jatty. Sol sebepti de shyǵar ol birshama ómirsheń týyndy bolypshyqty. Biz túsirilim barysynda eń bastysy - sapa degen máseleni nazarda ustadyq. Bir tóbelesten birneshe dýbl jasaý qajet bolǵan kezder de boldy. Biraq, er azamattar úshin bul úlken kedergi bolmaýy tıis»,-dedi Adambaı.
Onyń sózinshe, fılmniń bıýdjeti 400 myń dollardy qurady. «Sabına kelin» fılmine qaraǵanda bul jolǵy shyǵyn eki esege kóp.
Fılmde basty rólderdi Nurtas Adambaı, Asan Májıt, Erkebulan Daıyrov, Gúlnaz Jolanova, Tólegen Baısaqalov, Jandos Aıbasov, Kámshat Joldybaeva men ózgeler oınaıdy.
