Nurtas Adambaı «Taraz» fılmin YouTube-qa jarııalady
ASTANA. QazAqparat - Nurtas Adambaıdyń «Taraz» kınodramasy YouTube saıtynda jarııalandy.
«Buǵan deıin ýáde etkenimizdeı, biz fılmdi tegin kórý múmkindigin jasaý úshin YouTube-qa jarııaladyq. Kórińizder!», - dep habarlady Facebook-tegi paraqshasynda prodıýser, rejısser jáne akter Nurtas Adambaı.
Eske sala keteıik, fılmniń tusaýkeseri 2016 jyldyń 13 qazany kúni Qazaqstannyń barlyq kınoteatrlarynda jasaldy. Kıno-dramada Nurtas Adambaıdan basqa Erkebulan Daıyrov, Asan Májıt, Gúlnaz Jolanova, Tólepbergen Baısaqalov, Jandos Aıbasov, Kámshat Joldybaeva, Nurjan Sadybekov, Marat Abdýllaev, Ashım Ahmetovter oınady.
2016 jyly qyrkúıekte «Taraz» dramasy AQSh-tyń Los-Andjeles qalasynda ótken Genre Celebration Film Festival kınofestıvalinde eki atalym boıynsha jeńiske jetti: «Úzdik dramalyq fılm» jáne «Úzdik operatorlyq jumys».
Kınokartına, sondaı-aq, San Francisco International New Concept Film Festival (AQSh), Hamilton Film Festival and Canadian Film Market (Kanada), Gallup Film Festival (AQSh), Princeton Independent Film Festival (AQSh), Festival Internacional de Cine de Autor (Meksıka) syndy halyqaralyq festıvalderge qatysty.
