Nurtas Adambaı daýyl tónip kele jatqan Maıamıdiń jaı-kúıin baıan etti
ASTANA. QazAqparat - Belgili qazaqstandyq akter, rejısser ári prodıýser Nurtas Adambaı óziniń Maıamıge sapary jaıly aıtyp berdi, dep habarlaıdy «QazAqparat» HAA tilshisi.
«Keshe Maıamıdiń Vınvýd qalasy kútpegen jerden almatylyq stýdentterdi qarsy aldy. Olar úılerine 7-si kúni qaıtatyndyqtaryn aıtty. Ushyp úlgeredi dep úmittenemin. Olardyń esimderin de suramappyz. Ol jaqqa tónip kele jatqan daýyldyń qanshalyqty qaýipti ekenin biz alǵashqyda túsingen joqpyz. Sol kúni túnde áýejaıdan taǵy da Astana qalasynyń stýdentterin kezdestirdik. Olardyń reısterin 8-ine aýystyrypty. Biz olardyń jalǵa kólik alyp, ol jerden dereý ketýlerine keńes berdik», - dep jazdy ol Feısbýktegi paraqshasynda.
«Bizdiń jolymyz boldy, keptelis bastalǵanǵa deıin shyǵyp úlgerdik. Meniń dosym Temir Han sonda qalyp qoıdy. Tabıǵı apattyń basylýyn kúte turatyndyǵyn aıtty. Alaıda, ertesinde qońyraý shalyp, qaıtýǵa sheshim qabyldaǵanyn bildirdi. Bári jaqsy aıaqtalady dep senemin», - dedi Nurtas Adambaev.
«Dúkenderde sý joq, kóshelerde eshkim júrmeıdi. Terezeler men sóreler metall qalqandarmen jabylǵan. Qum toly qaptar tegin úlestirilip jatyr. Onda qalǵan dostar, abaılańyzdar!», - dep jazdy ol.
Aıta keteıik, Maıamıge «Irma» daýyly jyljyp keledi. Maıamı meri Fıl Levaın qalada evakýatsııa jarııalap, «Irmany» ıadrolyq daýyl dep atady. Levaın CNN-ge bergen suhbatynda qazir batyrsynýdyń ýaqyty emes, halyqty dereý qaýipsiz aımaqqa kóshirýdi bastaý kerektigin aıtty. BAQ málimetterinshe, Maıamı jáne Fort-Loderdeıl qalalaryna aıtarlyqtaı qaýip tónip tur.
