Nurtas Adambaev pen Dáýit Shaıhıslamov «KTK» arnasynan keshirim surady
ASTANA. 25 qyrkúıek. QazAqparat - «KTK» telearnasy avtorlyq quqymyzdy taptady» dep dúıim jurtty dúrliktirgen shoýmen Nurtas Adambaev pen onyń áriptesi Dáýit Shaıhıslamov
aqyry aıtqandarynan aınydy. Qos seri keshe buqaralyq aqparat quraldary aldynda «KTK»-ny negizsiz qaralaǵanyn resmı moıyndady. Bul týraly atalmysh telearna habarlady.
«Iá, baǵdarlama olarǵa tıesili. Biraq ondaǵy barlyq obrazdardy «KTK-nyń» tehnıkasy emes, biz jasap keldik. Sondyqtan bizdiń quqymyz teń. Olardyń avtorlyq quqyqtary tek operator, rejısser sııaqty qyzmettermen ǵana shekteledi», - degen bolatyn buǵan deıin Nurtas Adambaev.
Esterińizde bolsa, naýryz aıynda «Nasha Kazasha» baǵdarlamasynyń eks-músheleri Nurtas Adambaev pen Dáýit Shaıhıslamov BAQ ókilderin jınap, «KTK» telearnasy «zańsyzdyqqa jol berdi», «avtorlyq quqymyzdy taptady» dep aıyptaǵan bolatyn. Qos KVN-shıktiń ondaǵy maqsaty «Nasha Kazasha» markasyn ózderimen alyp ketý bolypty. Biraq sot barysynda atalmysh jobanyń «KTK»-ǵa tıesili ekendigi dáleldendi. Al qos shoýmenge negizsiz qaralaǵany úshin «KTK» arnasynan resmı túrde keshirim suraý mindetteldi. Búgin sottyń osy úkimine sáıkes, Nurtas pen Dáýit aıtqan sózderin jeke-jeke joqqa shyǵaryp, sý ishken qudyqtaryna túkirgenderin moıyndady.
Aıta keteıik, qazir Adambaev pen Shaıhıslamov «7-Arnanyń» efırinde «KZ-landııa» baǵdarlamasymen shyǵyp júr.
