Nursultandaı dosyń bolsyn!
NUR-SULTAN. QazAqparat - 1998 jyl bolatyn. QR Prezıdenti jumys aıaǵyna taman Astanadan Táshkenge jumys saparymen shyqqan edi. «Habar» telearnasy atynan birinshi borttaǵy úshinshi salonda keshki asymyzdy iship bitirgende, Prezıdenttiń Birinshi Kómekshisi (ol kezde osyndaı laýazym bolǵan) meni ekinshi bıznes salonǵa, janyndaǵy bos orynǵa shaqyrǵan edi.
-Myna derekterdi bile júrgenin durys bolar,-dep qolyma papki ustatty.
Kesh qaraıa ushaǵymyz Táshkenge qondy. Prezıdent N. Nazarbaev korteji birden Ózbekstan Prezıdentiniń rezıdentsııasyna bet burǵan. Biz jýrnalıster búginge demalysymyz ǵoı dep asyqpaı qonaq úıge qaraı jınaldyq. Kóligimiz meımanhana aldyna toqtaǵanda, Prezıdentter press-konferentsııa ótkizedi degen habar tústi. Tez jınalyp qaıtadan rezıdentsııaǵa tarttyq. Jol boıynda kólik te, adam da kórmedik.Tek qazdıyp turǵan saqshylar.
Rezıdentsııaǵa kirerde kúzet qyzmetinen ótý uzaqqa sozyldy. Shaǵyn májilis zalynyń tórindegi qos kresloda eki Prezıdent jýrnalısterdi kútip sháı alyp otyr eken. Birden baıqaǵanymyz resmı kezdesý ózbektiń dámdi dastarhanynan bastalǵany sezilip turdy. Úı ıesi retinde Islam Karımov patsha kóńilmen: «Nursultan Ábishulymen birge senderdiń barlyq suraqtaryńyzǵa jaýap berýge daıynbyz»,- dedi.
Qazaq-ózbek jýrnalısteri kún tártibindegi máselelerdi suraǵan. Kezegim kelgende men Ózbek basshysynan:
«Qazaq, ózbekti óz aǵam, deıdi. Osy oraıda Ortalyq Azııa respýblıkalyrynyń ekonomıkalyq odaǵyn qurý týraly Qazaqstan usynysyna ne deısiz jáne Sovet Odaǵy qulaǵan soń, Táýelsizdigin jarııalaǵan memleketter arasynda shekara tutastyǵyna alkózdikpen qaraý pıǵyldary týraly kózqarasyńyzdy bilsem dep edim?»,- degenmin.
-Sen, shekara problemasynda Jırınovskııdi aıtyp turǵan bolarsyń? Ol pále Qazaqstannyń soltústikindegi bes oblys Reseıdiki dep saıraýyn qoımady ǵoı. Máskeýge arnaıy baryp, senderge bulaı sóılemeıtindeı etip Jırınovskııdi qýyp júrip taıaqtaımyn. Endi ondaı sańdyraq aıtpaıtyndaı qylam!- dep bizdi bir dý kúldirip alǵan.
Sosyn: «Qazaq, ózbekti óz aǵam dese, Men qazaqtan Nursultan Ábishulyndaı senimdi ári myqty dos tapqanyma maqtanamyn. Nursultan dosym qaıda, qaı jaqqa jol bastasa da adastyrmaıdy, onyń aıtqany qashanda tup - tura, biz qoldaımyz! Nursultandaı dosyń bolsyn!»- degen edi.
Keıinen Karımovtyń osy sózi «Qazaqtan dosyń bolsa, joldan adaspaısyń!» degen ózbektiń halyq maqalyna aınaldy. Osy máslıhattan sol kúni qaz-qalpynda sıýjet jasap «Habardyń» efırinen ótkizdik. Elbasymyzdyń sarabdal saıasaty týraly daıyndaǵan sansyz telehabarlarymyz «Habar» arhıvine saqtaýly bolar. Kóp dúnıeniń búginde de salmaǵy salıqaly kúıinde saqtalyp otyr. Ótken kúnde belgi kóp.
