Nursultan Jańabaev WBC reıtıngine kirdi

ASTANA. QazAqparat - Birinshi orta salmaqtaǵy qazaqstandyq boksshy Nursultan Jańabaev (6-0, 4 KO) Búkilálemdik boks keńesi (WBC) reıtınginiń jańartylǵan nusqasyna engizildi, dep habarlaıdy Sports.kz.

WBC reıtıngindegi óz dıvızıonynda qazaqstandyq 39-pozıtsııaǵa ornalasty.

Oǵan uıymynyń reıtıngine kirýge jeltoqsanda fılıppındik boksshy, ataqty otandasy Mennı Pakıaonyń sparrıng-áriptesi Arnel Tınampaıdan (25-23-1, 11 KO) basym túsýi sebep boldy. Onda Jańabaev on raýndtyń qorytyndysy boıynsha qarsylasyn jeńip, WBA Asia chempıongy tıtýlyn enshilegen edi.

Nursultan Jańabaev 2016 jyldyń qazan aıynda profı-rıngke alǵash ret shyqty. Sodan beri alty ret aıqasyp, onyń tórteýin nokaýtpen aıaqtady.