Nursultan Tursynov Tokıoda tóreshiler qateliginen jeńildi – Bas bapker

NUR-SULTAN. QazAqparat – Grek-rım kúresinen Qazaqstan quramasynyń bas bapkeri Baqtııar Baıseıitov Tokıo Olımpıadasynda sportshylardyń oıynyna qatysty pikir bildirdi, dep habarlaıdy QazAqparat.

«Japondyq qarsylas Demeýdiń (Jadyraev – red.) qolyn kótergenin kútti. Bul bir úlken qatelik boldy. Biz oǵan basyńdy túsirme, ol óte qaýipti dep únemi aıttyq. Jarystyń aıaqtalýyna 30 sekýnd qalǵan edi. Ol sharshap, basyn túsirgeni sol edi, «jazalaý» bastalyp ketti. Ózi de japondyq balýannyń jeńip ketkenin túsinbeı qaldy», - dedi bas bapker Ortalyq kommýnıkatsııalar qyzmetindegi onlaın brıfıngide.

Nursultan Tursynovqa kelsek, bapker onyń jaqsy daıyndalǵanyn jetkizdi.

«Daıyndyǵy myqty bolǵanymen, ol tórt jyl úziliste otyryp qaldy. Bálkim saıys tájirıbesi jetpeı qalǵan shyǵar. Tipti osy jaǵdaıda da ol óte jaqsy kúresti. Onyń jeńilgenin tóreshilerdiń qateligi dep esepteımin», - dedi Baqtııar Baıseıitov.

Buǵan deıin bas bapker Nursultan jasaǵan ádistiń baǵalanbaı qalǵanyn aıtqan edi. Tóreshiler oǵan eki upaıdy bergende, Nursultan jeńiske jeter edi.

Sondaı-aq, Baqtııar Baıseıitov Tokıo Olımpıadasynda sportshylardyń oıyny úshin qazaqstandyqtardan keshirim surady.