Nursultan Tursynov – eki dúrkin Azııa chempıonatynyń kúmis júldegeri atandy
ASTANA. KAZINFORM – Bishkekte kúres túrlerinen ótip jatqan Azııa chempıonatynda grek-rım kúresinen qazaqstandyq balýan Nursultan Tursynov kúmis júldege ıe boldy.
87 keli salmaqta el namysyn qorǵaǵan otandasymyz fınalda ırandyq Hassem Alızadege 0:5 esebimen ese jiberdi.
Osy oraıda aıta keteıik, ótken jyly eki balýan Astandaǵy Azııa chempıonatynyń fınalynda taǵy da joldary túıisip, jeńisti ırandyq balýan alyp ketken edi. Mine, bul joly da Tursynov syralǵy qarsylasynan aılasyn asyra almady. Osylaısha ekinshi ret Saryqurlyq dodasynyń kúmis júldegeri atandy.
Esterińizge sala ketsek, osyǵan deıin grek-rı kúresinen 63 keli salmaqta el namysyn qorǵaǵan otandasymyz Erjet Jarylqasyn fınalda japonııalyq Aıata Sýzýkıdi jeńip, jeńis tuǵyrynyń eń bıik satysynan kórindi. Sonymen qatar taǵy bir balýanymyz Ibragım Magomadov el qorjynyna qola medal syılady.
Osylaısha búgin grek-rım kúresinen boz kilemge kóterilgen 5 balýannyń úsheýi júlde jeńip aldy.
Onyń biri altyn, ekinshisi kúmis, al úshinshi júlde qola medal.
Ókinishke qaraı 55 kelidegi Nurzat Qabdyrahımov shırek fınalda ózbekstandyq Jasýrbek Artyqbaevtan jeńilip qalsa, 130 kelidegi Mansur Shadýkaev shırek fınalda qyrǵyzstandyq sportshyǵa jol berip, ekeýi jarysty júldesiz aıaqtady.
