Nursultan Nazarbaevtyń ómiri Qazaqstannyń tarıhymen jáne onyń halqynyń taǵdyrymen berik baılanysty
Bul týraly Aqordanyń baspasóz qyzmeti habarlady.
Máselen, Qyrǵyz Respýblıkasynyń Premer-Mınıstri T.Sarıev Qyrǵyzstan halqy Nursultan Nazarbaevqa úlken qurmetpen qaraıtynyn aıtady. «Baýyrlas halyqtarymyz arasyndaǵy dostyq qarym-qatynasty damytyp, nyǵaıtý isine Sizdiń qosqan zor úlesińizdi rızashylyq jáne alǵys sezimmen atap aıtamyz. Qazaqstanmen aradaǵy ekijaqty baılanystardy óristetýge Qyrǵyzstannyń zor mán berip otyrǵanyn taǵy da rastaǵym keledi», - delingen hatta.
Reseı Federatsııasy Qarachaı-Cherkes Respýblıkasynyń basshysy R.Temrezov Nursultan Nazarbaevtyń ómiri Qazaqstannyń tarıhymen jáne onyń halqynyń taǵdyrymen berik baılanysty ekenine toqtalǵan. «Naǵyz kóshbasshy retinde Siz ózińizdiń kúsh-qaıratyńyzdy, ómirlik jáne kásibı tájirıbeńizdi Qazaqstannyń memlekettiligi men egemendigin, saıası turaqtylyǵyn nyǵaıtýǵa, áleýmettik-ekonomıkalyq damýyna, etnosaralyq jáne konfessııaaralyq tatýlyqty saqtaýǵa jumsap kelesiz. Shynaıy ınternatsıonalıst jáne óz Otanynyń patrıoty retinde eldiń kúshi onyń halqynyń birliginde ekenin siz árdaıym túsine bildińiz», - dep jazady avtor.
Óz kezeginde Mońǵolııanyń Tuńǵysh Prezıdenti P.Ochırbat mońǵol halqy Nursultan Nazarbaevty eńbeginiń tarıhı mańyzy bar memleket qaıratker retinde jaqsy biletinin aıtqan. «Siz Mońǵolııa men Qazaqstan arasynda dostyq qarym-qatynas pen yntymaqtastyqty damytý baǵytynda ıgi is bastadyńyz. Siz alǵa qoıǵan bıik maqsattyń biri Qazaqstandy álemniń 30 damyǵan eliniń qataryna qosý bolǵandyqtan, elińizdi jarqyn bolashaq kútip tur», - delingen hatta.
Reseı Federatsııasynyń Mádenıet jónindegi qoǵamdyq palatasynyń komıssııasy tóraǵasynyń birinshi orynbasary, Halyqaralyq «Jandy ǵalamshar» ekologııalyq qozǵalysy basqarmasynyń tóraǵasy N.Drozdov Qazaqstan táýelsizdiginiń ornyǵýyndaǵy Nursultan Nazarbaevtyń tarıhı róli álemdik qoǵamdastyq tarapynan joǵary baǵalanǵanyn atap ótken. «Sizdiń basshylyǵyńyzben Qazaqstan halyqtyń ál aýqatyn jyl ótken saıyn arttyryp, etnosaralyq kelisimdi nyǵaıtyp, ózge memlekettermen beıbit dıalog ornatyp ári ony órbite otyryp, qalyptasýdyń kúrdeli jolynan ótti jáne zor ekonomıkalyq tabystarǵa jetti», - dep jazady avtor.
Demokratııalyq «Ak jol» partııasynyń tóraǵasy A.Perýashev zamanaýı memlekettilikke qol jetkizýden bastalyp, Uly dala tósinde ǵajaıyp Astanany salýmen aıaqtalatyn búgingi Qazaqstannyń árbir jetistigi Nursultan Nazarbaevtyń tabandylyǵymen, progressıvtik saıası jigerimen tikeleı baılanysty ekenin aıtqan. Sondaı-aq ol is júzinde tek ákimshilik ortalyq emes, eldiń mádenı jáne rýhanı júregine aınalǵan Astananyń 17 jyldyǵyn merekeleý joǵary deńgeıde ótkenine, nazar aýdardy.
Qazaqstandyq kásibı zań konkýrsynyń laýreattary óz hattarynda respýblıkamyz Nursultan Nazarbaevtyń basshylyǵymen gúldene túsip, búkil álemdi moıyndatýyn jalǵastyryp kele jatqanyn jazypty. «Bizdiń jan-júregimiz Sizge degen maqtanysh sezimine toly. Qazaqstandy jeńisti bir belesten ekinshisine bastaýdaǵy Sizdiń batyldyǵyńyz bizdi qanattandyrady. Sizdiń «100 qadam» atty baǵdarlamańyz jańa reformalarǵa ár azamattyń atsalysýy úshin jańa kókjıekterge jol ashady», - delingen hatta.
A.Seleznev atyndaǵy Almaty horeografııa ýchılışesiniń ujymy halyqaralyq baılanystardyń keńeıýi, mańyzdy saıası sheshimderdiń qabyldanýy, kóptegen ınvestıtsııalyq jobalardyń iske asýy, ekonomıkalyq damý, turaqtylyq pen birlik Nursultan Nazarbaevtyń kóregen saıasatynyń nátıjeleri ekenine nazar aýdarǵan.
Sondaı-aq óz quttyqtaýlaryn Chehııadan D.Selıvanov, Ýkraınanyń Kıev qalasynan A.Mýrashko, Almaty qalasy men Almaty oblysynan Úleskerlerdiń biryńǵaı úılestirý keńes músheleri, Atyraý oblysy Inder kentinen A.Esenǵalıeva, Qyzylorda oblysy Aral qalasynan Q.Erǵazıev, Almaty qalasynan S.Lıýlına, Qaraǵandy qalasynan S.Áýbákiruly jáne Shegirovtar otbasy, Jambyl oblysynan N.Baıshókenov, Shyǵys Qazaqstan oblysy Semeı qalasynan E.Orazalın, Soltústik Qazaqstan oblysynan B.Baımaǵambetova, sondaı-aq Astana qalasynan B.Tájimanova jáne Shevchenkolar otbasy joldady.
Jyly lebizdi quttyqtaýlar qazaqstandyq jastar ókilderinen - Almaty oblysy Esik qalasynan Á.Azattan, Almaty qalasynan S.Batsıevten kelip tústi.
Memleket basshysyn erekshe óleń joldary arqyly Ońtústik Qazaqstan oblysynan T.Qojanov jáne Pavlodar oblysynan D.Aqataev quttyqtady.
Memleket basshysy atyna quttyqtaý hattary men jedelhattary áli de kelip túsýde.