Nursultan Nazarbaevtyń qandaı jastarǵa kóńili tolmaıdy

ASTANA. QazAqparat - Ár urpaq óz jolymen júrip, zamanyna saı bolýy qajet. Bul týraly búgin Aqordada otandyq jáne sheteldik jýrnalıstermen kezdesken Elbasy Nursultan Nazarbaev aıtty, dep habarlaıdy QazAqparat.

«Qaı kezde bolmasyn, aǵa býynnyń jastarǵa kóńili tolmaı júredi. Sizdiń Prezıdent retinde qazirgi jastar týraly pikirińiz qandaı?», - dep suraǵan edi kezdesý barysynda BAQ ókilderi QR Prezıdentinen.

«Biz jas bolǵanda úlkenderdiń kóńili bizge de tolmaıtyn. Árkim óz ýaqytysynda ótedi. Sondyqtan bul jerde ne aıtýǵa bolady? Bul jerde eshqandaı jańalyq joq. Úlken býynnyń dál izimen adamdardyń barlyǵy júretin bolsa eshqandaı jańalyq ta, bilim de, alǵa jyljý da bolmaıdy. Ár urpaq óziniń jolyn tabýy kerek. Óz jolymen júrip, zamanyna saı bolýy qajet. Sondyqtan oǵan ókinip, kóńili tolmaý degen durys», - dep jaýap berdi Memleket basshysy.

Sonymen qatar Elbasy qylmys jasap, nashaqorlyqqa boı aldyratyn, teris qylyqtar jasaıtyn jastarǵa kóńili tolmaıtyndyǵyn ashyq aıtty.

«Men qazaqtyń balalary nashaqorlyqqa barsa renjımin. Esh ýaqytta qazaqtyń tarıhynda ondaı bolǵan emes. Basqalarǵa eligip, jaman jaqqa baratyn bolsa soǵan qınalamyn. Bul da memlekettiń qolyndaǵy másele. Eger de jastar oqıtyn bolsa, qolynda jumysy bolatyn bolsa, óz isimen shuǵyldanatyn bolsa, basqaǵa ýaqyty bolmas edi. Sondyqtan men jastarǵa jaqsylyq pen baq tileımin. Zaman tynysh bolyp, jastardyń joly ashyq bolsyn», - dep aıaqtady oıyn QR Prezıdenti.