Nursultan Nazarbaevtyń arqasynda ınvestıtsııalyq klımat jaqsara tústi - Mıtsýakı Arıto

ASTANA. QazAqparat - Keshe keshke ınternetten estip, qatty tań qaldym. Prezıdent Nursultan Nazarbaev shamamen 30 jylǵa deıin Qazaqstan úshin baryn salyp, jetekshilik jasady. Osyndaı uly tulǵanyń kenetten óz erkimen otstavkaǵa ketkenin estip, kádimgideı qobaljydym. Bul pikirdi Marýbenı korporatsııasynyń Eýropa men TMD memleketterine jaýapty bas menedjeri (Japonııa) Mıtsýakı Arıto bildirdi, dep habarlaıdy QazAqparat.

«Prezıdenttiń otstavkaǵa ketýi óte ókinishti. Degenmen, Marýbenı korporatsııasy Qazaqstanmen yntymaqtastyǵyn ózgertýge degen nıeti joq, sondaı-aq aldaǵy ýaqytta da ártúrli formada birge jumys isteımiz dep oılaımyn.

Aldymen, buryn bizdiń kompanııamyzdyń Qazaqstanda qol jetkizgen jetistikteri jóninde sóz qozǵaıtyn bolsam, Astana áýejaıynyń modernızatsııasyna qatysty joba, «Qazatomónerkásippen» birlesip jasap otyrǵan ýrandy óndirý jobasy, sondaı-aq sońǵy ýaqytta Atyraýdaǵy munaı óńdeý zaýytyna qatysty jobalar bar. Endi aldaǵy ýaqyttaǵy jańa jobalar retinde kóliktik ınfraqurylym jáne hımııa salasyndaǵy zaýytqa qatysty baılanystar boıynsha yntymaqtasamyz dep oılaımyn»,-deıdi Mıtsýakı Arıto.

Onyń aıtýynsha, Qazaqstannyń Tuńǵysh Prezıdenti N.Nazarbaev kúsh salyp, kóshbasshylyq kórsetýiniń arqasynda ınvestıtsııalyq qatynastar úlken qarqynmen damyp jatyr. Nursultan Nazarbaevtyń úlken erliginiń nátıjesinde ınvestıtsııalyq klımat jetkilikti túrde jaqsardy.

«Jalpy N.Nazarbaev alǵashqy Keńes Úkimetinen táýelsiz memleketke aınalǵan jańa Qazaqstanǵa 30 jylǵa jýyq ýaqyt boıy jetekshilik etti. Sonyń ishinde Japonııamen yntymaqtastyq turǵysynda jańa atap ótkendeı, ýrandy óńdeý, sondaı-aq ártúrli kompanııalardyń kóptegen salalar boıynsha bıznes jasaýǵa jáne eń bastysy eki eldiń birin-biri tanýyna degen qyzyǵýshylyqtar aıqynys kórinis tapty. Osynyń barlyǵy Nursultan Nazarbaevtyń erliginiń arqasy dep oılaımyn. Al Prezıdent qyzmetine kirisken Qasym-Jomart Toqaev N.Nazarbaevtyń alǵa qoıǵan baǵyty boıynsha jańa Qazaqstandy qurady degen oıdamyn»,-dedi korporatsııa menedjeri.