«Nursultan Nazarbaevtan asqan suńǵyla saıasatker joq» - respýblıkalyq basylymdarǵa sholý
ASTANA. Mamyrdyń 20-sy. QazAqparat - Qazaq aqparat agenttigi respýblıkalyq basylymdarda mamyrdyń 20-sy, beısenbi kúni shyqqan ózekti materıaldarǵa sholýdy usynady.
«Alash aınasy» gazetiniń beısenbilik sanyndaǵy «DAT» aıdarynda A.Baıtursynuly atyndaǵy Til bilimi ınstıtýtynyń dırektory, fılologııa ǵylymynyń doktory, professor Sherýbaı Qurmanbaıuly «Qazaqtildi mıkrobıologtardy, kıbernetıkterdi, energetıkterdi kóptep daıyndamaı, ol salalar eshqashan qazaqsha sóılemeıdi», degen óz oıyn ortaǵa salǵan. Ǵalymnyń pikirinshe, qazaq termınologııasynyń sheshimin tabýǵa tıis máseleleri az emes. Tilshi-termıntanýshylar men sala mamandarynyń bul baǵyttaǵy atqaratyn jumystary áli jetkilikti. Termınqorymyzdy qalyptastyrýda osy ispen tikeleı aınalysyp júrgen keıbir bilikti mamandar bolmasa, jalpy jurtshylyqtyń durys túsine almaı júrgen nemese durys túsindirilmeı júrgen máseleleri de bar. Olardyń aq-qarasyn ajyratyp, kópshilik qaýymǵa júıeli, uǵynyqty, dáleldi etip túsindirý de - mamandar isi.
«Jıyrmasynshy ǵasyrdyń sońynan bastap, qyz-kelinshekterimiz semizdikpen kúrese bastady. Sebebi bizdiń kúndelikti qoldanatyn tamaǵymyz da ózgerdi. Ýaqyttyń tyǵyzdyǵyna baılanysty júre jeıtin taǵamdar kóbeıdi. Myna qarbalas ómirde keıbir jumysqa, sabaqqa asyqqan qyz-kelinshekter tańsáriden ketip, túski as ishýge ýaqyty bolmaı, bárin jınap keshkisin biraq ishýdi ádetke aınaldyrdy. Dáriger-dıetologtardyń aıtýyna qaraǵanda, durys tamaqtanbaý da adamdardy semizdikke aparap soǵady. Odan qutylýdy kózdegen áıel zaty túrli amaldardy jasap jatady», dep jazady «Alash aınasy» gazeti «Aryqtaımyn dep aýrý taýyp almańyz» atty maqalasynda. Aryqtaý problemalary týraly jazylǵan jarııalanymdy basylymnyń 3-shi betinen oqýǵa bolady.
Qazaqtyń álem tanyǵan qaıratker aqyn uly Oljas Omaruly Súleımenov taıaýda Eýropadan elge kelip, mamyrdyń 18-i kúni týǵan kúnin almatylyq stýdent jastardyń arasynda ótkizdi. Kelesi jyly, amandyq bolsa, óziniń 75 jyldyq mereıtoıyn atap ótkeli otyrǵan aqyn týǵan kúnin bul joly da alaýlatpaı, jalaýlatpaı-aq oqyrmandarymen júzdesýdi jón kóripti. Osy oraıda seısenbi kúni Almatydaǵy Qazaq ulttyq agrarlyq ýnıversıtetinde aqynmen kezdesý keshi boldy. «Alash aınasy» gazeti búgingi nómirinde oqyrman nazaryna O.Súleımenovtiń oı oramdarynyń keıbir tustaryn usynyp otyr.
***
«Shekaradaǵy shekteýler alynyp tastaldy». «Aıqyn» gazetiniń búgigngi nómirinde osy taqyryppen basylǵan maqalada Qyrǵyz elimen aradaǵy birqatar shekteýlerdiń alynǵany jaıynda jazylǵan. Basylymnyń habarlaýynsha, QR Prezıdenti mamyrdyń 20-synan bastap Qazaqstan-Qyrǵyzstan shekarasyndaǵy Qordaı, Sypataı batyr, Aısha bıbi ótkizý beketterindegi ýaqytsha shekteýlerdi alyp tastaý jóninde sheshim qabyldaǵan.
«Májilistiń bir top depýtaty Úkimetbasy Kárim Másimovke mamyrdyń 31-in «Jappaı qýǵyn-súrgin jáne ashtyq qurbandaryn eske alý kúni» dep qaıta rásimdeý jóninde usynys engizdi», dep jazady «Aıqyn» gazeti. «Ultty kúndi belgileıtin kez keldi» degen taqyryppen jaryq kórgen maqalanyń egjeı-tegjeıin basylymnyń beısenbilik sanynan oqı alasyzdar.
«Aıqyn» gazetiniń jazýynsha, Tájikstannyń astanasy Dýshanbede EQYU-nyń Іs basyndaǵy tóraǵasy, Memlekettik hatshy - Syrtqy ister mınıstri Q.Saýdabaevtyń qatysýymen Islam Konferentsııasy uıymy Syrtqy ister mınıstrleri keńesiniń 37-shi sessııasy ótken. Osy jaıt arqaý bolǵan maqala basylymda «Nursultan Nazarbaevtan asqan suńǵyla saıasatker joq» degen taqyryppen berildi. Tájikstan prezıdenti N.Nazarbaevtyń EQYU Sammıtin ótkizý týraly bastamasyn tolyq qoldaıtynyn aıtyp, «Nursultan Nazarbaevtan asqan suńǵyla saıasatker joq. Ol adam retinde de, sarapshy retinde de barlyq máseleniń mán-jaıyn bilip turady. N.Nazarbaev Qazaqstanǵa, qazaqstandyqtarǵa ǵana emes, Orta Azııaǵa, postkeńestik elderge kerek tulǵa», depti.
***
«Astana aqshamy» gazetiniń dástúrli «Áleýmet saýaly - ákim jaýaby» aıdarynda qala basshysy I.Tasmaǵambetov elordalyqtardyń ózderin tolǵandyrǵan saýaldaryna basylym beti arqyly tuşymdy jaýap beripti.
«Mamyrdyń 20-ynan bastap 051 qutqarý qyzmetiniń telefon nómiri 109 nómirine aýystyrylady», dep jazady «Astana aqshamy» gazeti. Astana qalasyndaǵy jumyldyrý daıyndyǵy, azamattyq qorǵanys apattardyń jáne dúleı apattardyń aldyn alý men joıýdy uıymdastyrý jónindegi basqarmanyń habarlaýynsha, buǵan deıin jedel shaqyrý jáne anyqtama qyzmetin alý úshin turǵyndar 112 nómirin teretin bolsa, endi olarǵa 109 qysqartylǵan nómiri boıynsha tegin qyzmet kórsetiledi.
