Nursultan Nazarbaevta burynǵy artyqshylyqtar bolmaıdy – Erlan Saırov
«Bul zańǵa toqtalsaq, osyǵan deıin Tuńǵysh Prezıdentte aýqymdy basymdyqtar bolǵan edi. Osy oraıda Pralament Májilisinde sóz sóıleý, ózine mınıstrlerdi shaqyrtý, memlekettik organdarǵa saýaldar joldaý múmkindigi boldy. Sondyqtan bul zańnyń kúshi joıylatynyn eskere otyryp, endi bul saıası basymdyqtary da bolmaıdy», - dedi E. Saırov Parlament palatalarynyń birlesken otyrysynan keıin tilshiler suraǵyna jaýap bere otyryp.
Onyń aıtýynsha, eks-prezıdent týystarynyń zań aldynda qandaı da bir jaýapkershiligi bolsa, onda tıisti jazasyn alýy kerek.
Sonymen qatar depýtat Tuńǵysh Prezıdent mártebesine qatysty normalar qamtylǵan 20 zań bar ekenin, osy oraıda el zańnamasyna aýqymdy aýdıt júrgiziletinin aıtty.
«Bul qujattarda Tuńǵysh Prezıdent eńbegi týraly máseleler qamtylǵan. Tıisti aýdıt júrgizilgennen keıin, bul baptardyń da kúshin joıý týraly bastama jasalady. Bıyl Májilis depýtattary tıisti jumysty atqaratyn bolady. Nursultan Nazarbaev eldiń eks-prezıdenti bolyp sanalady. Onyń qyzmeti Qazaqstan Respýblıkasynyń Prezıdenti týraly Zańy aıasynda retteledi. Bul qujatta eks-prezıdentterge qatysty naqty baptar qamtylǵan», - dedi Erlan Saırov.
Budan buryn habarlanǵandaı, QR Parlamenti palatalarynyń birlesken otyrysynda «QR Tuńǵysh Prezıdenti – Elbasy týraly» Konstıtýtsııalyq zańnyń kúshi joıyldy dep taný týraly» Konstıtýtsııalyq zań qabyldandy.
Atalǵan zań jobasy jalpyulttyq referendým nátıjesinde Qazaqstan Konstıtýtsııasyna engizilgen ózgeristerdi iske asyrý maqsatynda ázirlendi.
