«Nursultan Nazarbaev - «Jyl adamy» - respýblıkalyq basylymdarǵa sholý

***

«Egemen Qazaqstan» gazetiniń Qazaqstan Respýblıkasy Prezıdentiniń baspasóz qyzmetine silteme jasap habarlaýynsha, keshe Memleket basshysy Nursultan Nazarbaev BUU Bas hatshysynyń orynbasary, BUU Eýropalyq ekonomıkalyq komıssııasynyń atqarýshy hatshysy ıAn Kýbıshti, «Heenan Blaikie» zań korporatsııasynyń keńesshisi, Kanadanyń burynǵy Premer-mınıstri Jan Kretendi, Islam Damý bankiniń prezıdenti Ahmad Mohammed Alı Ál-Madanıdi, Azııa Damý bankiniń vıtse-prezıdenti Shao Jaony, EýrAzEQ-tyń Bas hatshysy Taıyr Mansurovty qabyldaǵan.

Máselen, Azııa Damý bankiniń vıtse-prezıdenti Shao Jaony qabyldaý kezinde eki jaqty yntymaqtastyqtyń máseleleri talqylanǵan. «Azııa Damý banki atynan men Prezıdent N.Á.Nazarbaevty daǵdarystyq kezeńnen keıingi eldegi tabystarymen jáne álemdegi qolaısyz qarjylyq jaǵdaıǵa qaramastan jedel ekonomıkalyq ósimge qol jetkizgendigimen quttyqtadym. Men Prezıdentke Azııa Damý bankiniń Qazaqstanmen birlesken yntymaqtastyq boıynsha ne istep jatqanyn baıandadym. Bıylǵy jyly biz jol qurylysy salasy men shaǵyn jáne orta bıznesti qoldaýda birqatar jobalardy qarjylandyrý úshin 1 mıllıardtan astam dollar bólýdi josparlap otyrmyz. Biz Qazaqstanmen yntymaqtastyq tabysty bolatynyna senimdimiz», depti Sh.Jao.

Sonymen qatar «Kazahstanskaıa pravda» gazetiniń de Qazaqstan Respýblıkasy Prezıdentiniń baspasóz qyzmetine silteme jasap habarlaýynsha, Elbasy qabyldaýynda bolǵan Islam Damý bankiniń prezıdenti Ahmad Mohammed Alı Ál-Madanı, «men úshin Nursultan Nazarbaevpen kezdesý jáne ony aldaǵy Elorda kúnimen quttyqtaý úlken qurmet. Men Qazaqstannyń astanasy qandaı qýatty qarqynmen damyp kele jatqanyn, eldiń ekonomıkasynyń arta túskenin kórip otyrmyn. Buǵan Prezıdent N.Á.Nazarbaevtyń saıasatynyń nátıjesinde qol jetip otyr. Biz Qazaqstannyń kelesi jyly Islam Konferentsııasy Uıymynyń tóraǵasy bolatynyna qýanyshtymyz. Bul Qazaqstan men ıslam elderiniń arasyndaǵy yntymaqtastyqtyń odan ári damýyna kómektesetin bolady», deıdi.

Keshe Qazaqstan Respýblıkasynyń Premer-Mınıstri Kárim Másimov Kanada úkimetiniń burynǵy basshysy Jan Kretenmen kezdesti. Bul jaıynda «Egemen Qazaqstan» gazeti QR Premer-Mınıstriniń baspasóz qyzmetine silteme jasap jazyp otyr. Kezdesý barysynda álemdik ekonomıkadaǵy aǵymdaǵy jaǵdaılar boıynsha pikir almasylyp, Qazaqstan-Kanada ekonomıkalyq ózara qarym-qatynasynyń perspektıvalary talqylanǵan. «Premer-Mınıstr Kárim Másimov keshe sondaı-aq, Islam Damý bankiniń prezıdenti Ahmad Mohammed Alı Ál-Madanımen kezdesti. Onyń aıasynda Islam bankınginiń Qazaqstandaǵy damý máseleleri men ekijaqty ózara is-qımyl jaıy talqylandy», dep jazady basylym.

«Egemen Qazaqstan» gazetiniń jazýynsha, EQYU-nyń Іs basyndaǵy tóraǵasy, Qazaqstan Respýblıkasynyń Memlekettik hatshysy - Syrtqy ister mınıstri Qanat Saýdabaev AQSh-tyń Memlekettik hatshysy Hılları Klıntonmen telefon arqyly sóılesti. Áńgimelesýshi taraptar Qyrǵyzstanda maýsymnyń 27-inde ótken referendýmdy talqylaı otyryp, plebıstsıt aıtarlyqtaı ereje buzýshylyqtarsyz, tynysh jaǵdaıda ótkeni týraly halyqaralyq baqylaýshylar bergen baǵamen kelisti. Ekeýara áńgimede jaqyn arada senim men tózimdilik jaǵdaıyn qaıta ornatý mańyzdylyǵy atalyp ótildi. Sonymen qatar, Uıymnyń sammıtin, shildeniń 16-17-si aralyǵynda Almatyda ótetin EQYU Syrtqy ister mınıstrleriniń beıresmı keńesin ótkizý men daıyndyq sharalary qarastyryldy.

«AQSh Memlekettik hatshysy Qazaqstan Prezıdenti N.Nazarbaevqa jáne EQYU-daǵy qazaqstandyq tóraǵalyqqa Ortalyq Azııa aımaǵynda beıbitshilik pen qaýipsizdik ornatýdaǵy úlesi úshin alǵysyn bildirip, qoldaıtyndyǵyn jetkizdi», dep jazady basylym.

***

«Ár nárestege depozıt ashý máselesin memlekettik deńgeıge deıin kóteretin ýaqyt jetti me?». «Alash aınasy» gazetiniń beısenbilik sanyndaǵy «Oı-kókpar» aıdarynyń búgingi saýaly osylaı órilgen. Saýalǵa jaýap bergen saıasattanýshy, Qaraǵandy oblysy Ulytaý aýdanynyń ákimi Berik Ábdiǵalı «jalpy elimizde týylǵan árbir balaǵa arnap depozıt ashý júıesin jappaı engizetin ýaqyt jetti. Qazir eń aldymen halqymyzdyń sanyn kóbeıtýdi maqsat etip otyrǵandyqtan, demografııany kóteretin barlyq is-áreketterden bas tartpaýymyz kerek. Qazirgi tańda halqymyzdyń sany az. Munaıdan túsetin tabyspen salystyrǵanda, bizdiń jas analarǵa kórsetip otyrǵan kómegimiz de mardymsyz», dese, Qazaqstannyń demografııa ǵylymynyń negizin salýshy Maqash Tátimov, «elimizde týylǵan árbir balaǵa jeke-jeke depozıt ashý múmkin emes shyǵar, alaıda tórtinshi baladan bastap memleket óz moınyna alsa, quba-qup bolar edi. Osy oraıda óz basym otbasynda týylǵan árbir balaǵa emes, tórtinshi baladan bastap depozıt ashýdy qoldar edim», degen pikirin alǵa tartady.

«Alash aınasy» gazetiniń beısenbilik nómirinde elimizdegi qylmyskerlerdiń jasaryp bara jatqandyǵyn kóterip otyr. Basylymnyń keltirgen derekterine qaraǵanda, qazirgi tańda 17 myńnan astam jasóspirim qylmystyq esepte tur eken. Al byltyrǵy jyly balalar qolymen jasalǵan qylmys sany 5 myńdy qurasa, aǵymdaǵy jyldyń basynan beri 2 myńdaı bala kezdeısoq qylmystardyń qurbany bolyp úlgergen. Bul jaıynda tereńirek basylymnyń búgingi sanyndaǵy «Qylmyskerler jasaryp barady» degen maqaladan oqı alasyzdar.

Astana shaharynda bokstan ótip jatqan Elbasy kýbogy halyqaralyq týrnıriniń sharshy alańdaǵy básekeleri endi qyzyp keledi. Keshe ekinshi kún qorytyndylady. Sporttyń osy túriniń jankúıerleri bylǵary qolǵap sheberlerinen kimniń utylǵanyn, kimniń utqandyǵyn «Alash aınasy» gazetinen oqı alady. Máselen, 69 keli salmaqta óner kórsetetin Serik Sápıev qarsylasy sırııalyq Abýl Azızdi alǵashy mınýtta-aq nokaýtqa jibergen. Osy boksshy basylym tilshisine bergen suhbaty barysynda «Elbasy kýbogynyń keshegi ashylý saltanatyna kelgen áıgili Maık Taısonmen birge sýretke túsýge múmkindik týdy. Sol sátte aýdarmashy meniń eki dúrkin álem chempıony ekenimdi aıtty. Al Taıson bolsa, qushaqtap, qolymdy alyp, «Olımpıada chempıony bol» dedi. Men muny Taısonnyń bergen batasy retinde qabyldadym», depti. Maqala «Taıson Sapıevke bata berdi» degen taqyryppen basylǵan.

***

«Astana kúnin merekeleý qarsańynda birneshe jyl buryn úıli bolamyn dep úptelip qalǵan úleskerler baspana kiltine ıe boldy. Osyǵan oraı Nursultan Nazarbaev «Nursaıa» turǵyn úı kesheninde bolyp, problemalyq qurylysqa qatysty memlekettik baǵdarlama sheńberinde salynyp bitken turǵyn úıdiń jaǵdaıymen tanysty», dep jazady «Astana aqshamy» gazeti búgingi nómirinde jaryq kórgen «Nursaıadaǵy» nurly kún» degen maqalasynda. Basylymnyń atap ótýinshe, atalǵan turǵyn úı kesheninde 487 páter bar. Onyń 240-y úleskerlerdiki. Sonymen qatar keshenniń birinshi qabatynda «Balapan» baǵdarlamasy aıasynda ashylǵan jalpy kólemi 2563 metrlik balalardyń mektepke deıingi shaǵyn ortalyǵy 600-den astam búldirshindi qabyldaýǵa qabiletti.

***

«Qazaqstan óz mindettemelerin oryndamaı, ulttyq zańymyzǵa muryn shúıire qaraıtyn, eldi qulpyrtýdy emes, tek óz qaltasyn qampaıtýdyń qamyn oılaıtyn ınvestorlarmen «at quıryǵyn kesisetin» bolady. Astanada ótken Mıneraldy resýrstar men metallýrgııa jónindegi І qazaqstandyq halyqaralyq kongreste Elbasy osyndaı qatań málimdeme jasady», dep jazady «Aıqyn» gazeti «Nursultan Nazarbaev - «Jyl adamy» degen taqyryppen basylǵan maqalasynda. Jarııalanymda Memleket basshysynyń «men ıgerý maqsatynda ken oryndaryn usynýǵa moratorıı engizemin. Óıtkeni ýaqytynda ken oryndarymyzdy qaptatyp satyp aldy, astaryna basty, biraq eshqaısysy qarajat salý boıynsha kontraktilik sharttardy oryndap jatqan joq», degen sózin keltirgen. Osy taqyrypqa oraı jaryq kórgen maqalalardy «Egemen Qazaqstan», «Alash aınasy», «Kazahstanskaıa pravda», «Lıter» basylymdarynan da egjeı-tegjeıli oqı alasyzdar.

«Aıqyn» gazetiniń búgingi nómirinde jarııalanǵan «Parlament saıası sahna shymyldyǵyn japty» degen maqalada atalǵan organnyń jazǵy kanıkýlǵa shyqqandyǵy jaıynda baıandalǵan. «Elbasy» ataǵyn zańdastyratyn qos zań jobaǵa veto qoımaý arqyly Nursultan Nazarbaev eń aldymen Parlament depýtattarynyń biraýyzdy sheshimine qurmet bildirdi», dep jazady basylym. Gazettiń atap ótýinshe, kópten beri únsizdik saqtaǵan Májilis basshysy O.Muhamedjanov keshe osyndaı túsinikteme bergen.

Qos palataly Parlamenttiń keshegi birlesken otyrysy jaıynda jaryq kórgen maqalalardy oqyǵyńyz kelse «Egemen Qazaqstan», «Alash aınasy», «Kazahstanskaıa pravda», «Lıter» basylymdaryna nazar salyńyz.