Nursultan Nazarbaev Joǵarǵy sot tóraǵasy Qaırat Mámıdi qabyldady
Kezdesýde Memleket basshysyna «100 naqty qadam» ult jospary aıasynda sot reformasyn iske asyrý jáne sot tóreligin atqarý jumystary jóninde esep berildi.
Elbasy sot júıesiniń jáne búkil quqyq qorǵaý salasynyń aldynda turǵan jumystardyń aýqymdy ekenin atap ótti.
- Azamattar sotqa senim artyp, kómek alý úshin júgingende, sheshim ádil bolyp, olardyń quqyqtary naqty qorǵalǵanda ǵana zańnyń tolyq ústemdigi qamtamasyz etiledi. Qazir olaı deýge áli erte, - dedi Qazaqstan Prezıdenti.
Memleket basshysy sot protsesinde jaryspalylyqtyń joqtyǵyna toqtalyp, advokatýranyń damýy álsiz ekenine nazar aýdardy.
- Sot júıesin jetildirý jónindegi barlyq sharalar keshendi túrde atqarylýǵa tıis. Jergilikti polıtsııa jumysyna syn aıtylýda. Bızneske jáne salyqqa qatysty tekserýler sany azaımaı otyr. Osy saladaǵy jumysty jónge keltirý kerek, - dedi Nursultan Nazarbaev.
Q.Mámı Memleket basshysyna quqyq qorǵaý salasynda júzege asyrylǵan reformalar sot júıesine oń áser etkenin baıandady.
- Respýblıkada sottar turaqty rejimde jumys isteýde. Bıyl 5 aıdyń ishinde sottarǵa 512 myńnan astam qylmystyq, azamattyq jáne ákimshilik ister kelip tústi. Solardyń 417 myńnan astamy belgilengen protsessýaldyq merzimde qaraldy, - dedi Joǵarǵy sot tóraǵasy.
Budan bólek, Q.Mámı Qazaqstan Prezıdentine azamattardyń sottarǵa shaǵymdanýy kóbeıip kele jatqany, sondaı-aq elektrondyq sot júıesin engizý nátıjeleri týraly baıandady.
Nursultan Nazarbaev kezdesý qorytyndysy boıynsha birqatar naqty tapsyrma berdi.