Nursultan Nazarbaev jergilikti sottar jumysyn synǵa aldy
ASTANA. QazAqparat - Elbasy Nursultan Nazarbaev jergilikti sottar jumysyn synǵa aldy, dep habarlaıdy QazAqparat.
"Ókinishke qaraı, tájirıbe júzinde ádildikti izdegen bizdiń azamattar joǵary sot ınstantsııasyna nemese prokýratýraǵa júginýge májbúr. Tek aǵymdaǵy jyly azamattyq ister boıynsha prokýratýranyń narazylyǵy turǵysynda Joǵarǵy sot tómen satydaǵy sottardyń 63 sheshimin qaıta qarady. Demek, biz barlyq quqyqtardy berip, barlyq qajettilikpen qamtamasyz etilgen tómen satydaǵy sottar ózderiniń qyzmetin oryndamaı otyr",-dedi Prezıdent Astanada bastalǵan Qazaqstan Respýblıkasy sýdıalarynyń VII sezinde.
Osy oraıda Memleket basshysy bul kemshilikter bastalǵan reformalardyń áli de sońyna deıin jetkizilmegenin baıqatyp otyrǵanyn aıtty.
Elbasynyń paıymynsha, sondyqtan da sot qyzmetin jaqsartý men bedelin arttyrý boıynsha júıeli túrde kúndelikti kóp eńbekti talap etetin jumys qajet.
"Azamattar tarapynan alańdaýshylyq úshin sebep bar. Ásirese, bul keıbir sýdıalar buzýshylyqtarǵa jol berip jatqanda ózekti. Tek aǵymdaǵy jyly tártiptik turǵyda 32 sýdıa jazalanyp, taǵy ekeýi jaǵymsyz ýájder boıynsha qyzmetinen bosatyldy. Bul kórsetkish burynǵyǵa qaraǵanda tómen bolýy múmkin, alaıda osy jaǵdaı jurtshylyqty jubatpaıdy", - dedi N. Nazarbaev.
