Nursultan Nazarbaev jastardyń ajyrasýyna alańdaýshylyq bildirdi
Prezıdent mektep qabyrǵasynda joǵary synyp oqýshylaryna otbasylyq qundylyqtardy úıretýdi usyndy.
«Jastardy otbasylyq ómirdiń jańa áleýmettik rólderine daıyndaý kerek. Muny orta mekteptiń joǵary synyptarynda bastaǵan jón. Búkil álemde qalaı turmysqa shyǵýdy, otbasyn qurýdy, ózin qalaı ustaý kerektigin úıretedi. Al biz áli uıalyp júrmiz. Analar ınstıtýtyn qoldaýmen birge, ákeler ınstıtýtyn da damytý kerek. Jas bozbalalardyń boıyna jaýapkershilik sezimin darytqan durys. Bul ońaı sharýa emes. Bárimiz jas boldyq .Mahabbat qumarlyqtan bastalady. Biraq, mahabbat degenimiz - bir-birine degen qamqorlyq. Eki adamnyń mahabbatynan bala dúnıege keledi. Adamdy bar bolmysymen qabyldap, erkindik berý - úlken danalyq», - dedi Elbasy Astanada ótken Jastar jylynyń ashylýynda.
Sonymen birge, Prezıdent jastarǵa otbasylyq qarym-qatynasta psıhologııalyq jáne áleýmettik qoldaý bildirý mehanızmderin jasaýdy tapsyrdy.
«Bárin alańdatyp otyrǵan másele - jas shańyraqtardyń kúıreýi. Táýelsizdik jyldary bir jarym mıllıon otbasy ajyrasty, onyń shırek bóligi nekeniń alǵashqy jylynda-aq ketisken. Nege bulaı bolǵanyn zertteý kerek. Árıne, kelispeýshilik, qarjynyń jetispeýshligi, baspananyń bolmaýy, ata-anamen birge turý jaǵdaılary bar. Qoǵam belsendileri, ǵalymdar, BAQ otbasy máselesine erekshe kóńil bólýi kerek. Otbasyn qurý - óte jaýapty másele», - dedi Prezıdent.
Eske sala ketsek, QR Prezıdenti Nursultan Nazarbaev Qazaqstan halqyna bıylǵy Joldaýynda 2019 jyldy Jastar jyly dep jarııalaýdy usynǵan bolatyn.
Jastar jylyna qatysty barlyq aqparatty «QazAqparat» agenttiginiń arnaıy paraqshasynan oqýǵa bolady.
