Nursultan Nazarbaev jastar jaıly: Jaqsyraq jumys isteıtinin kórip otyrmyz

NUR-SULTAN. QazAqparat – «Bolashaq» baǵdarlamasy boıynsha oqyp kelgenderge múmkindik berý kerek. QR Tuńǵysh Prezıdenti – Elbasy Nursultan Nazarbaev «Nur Otan» partııasy Saıası keńesiniń keńeıtilgen otyrysynda osylaı dedi, dep habarlaıdy QazAqparat tilshisi.

«Bolashaq» qaýymdastyǵynda úlken áleýet bar. Qaýymdastyq qazirgi tańda 10 myń adamdy biriktirip otyr. Bárin de bir kezderi memleket oqýǵa jiberdi. Al qazir ata-analar balalaryn shetelde oqytýǵa odan ary qumar. Búgingi tańda Qazaqstan syrtynda bizdiń 60 myńǵa tarta otandasymyz oqyp jatyr. Tipti, odan da kóp bolýy múmkin. Reseıdiń ózinde ǵana – 16 myń. Olar kelip, jumysyn isteıdi. Olarmen jumysty jalǵastyrý kerek», - dedi Tuńǵysh Prezıdent.

Elbasy bir kezderi «Bolashaq» boıynsha oqý bitirip kelgender jappaı oblystarǵa tarap, eńbek etkenin eske aldy.

«Olar aýdan jáne oblys ákimderiniń orynbasary boldy. Nelikten bul jumys toqtap qaldy? Mine, máselen, biz oqýǵa jibergenderdiń biri – Altaı Kólginov. Kezinde biz ony arnaıy oqýǵa jiberdik, al búgin ol qala basshylyǵynda otyr. Osyndaı azamattar kóp. Bárin ne úshin daıyndadyq? Qazir otyryp alyp, oryndyqty bergimiz kelmeıdi. Olardyń jaqsyraq jumys isteıtinin kórip otyrmyz. Áıtpese, bir jerge toqtap, damymaı qalamyz. Sol sebepti, kelesi jyldyń kókteminde ótetin «Jas Otan» sezinde bilimdi jastardy jumyldyrýdy talqylaýdy usynamyn», - dedi Elbasy.