Nursultan Nazarbaev jańa saılanǵan Meksıka prezıdentin quttyqtady

ASTANA. QazAqparat - QR Prezıdenti Nursultan Nazarbaev Andres Manýel Lopes Obradorǵa Meksıka Qurama Shtattarynyń Prezıdenti laýazymyna saılanýyna baılanysty quttyqtaý jedelhatyn joldady, dep habarlaıdy QazAqparat Aqordanyń baspasóz qyzmetine silteme jasap.

Memleket basshysy Qazaqstan halqynyń jáne jeke óziniń atynan Andres Manýel Lopes Obradordy Meksıka Qurama Shtattarynyń Prezıdenti laýazymyna saılanýymen quttyqtap, dostas Meksıka halqyna beıbit ómir men baq-bereke tiledi.

«Sizdiń saıası jáne qoǵamdyq qyzmetterdegi mol tájirıbeńiz Meksıkanyń odan ári damyp, halyqaralyq arenadaǵy bedeliniń nyǵaıa túsýine zor úles qosatynyna senimdimin.

Elderimiz arasyndaǵy dostyq qarym-qatynastar men yntymaqtastyq Sizdiń belsendi qoldaýyńyzdyń arqasynda ózara túsinistik pen turaqtylyq rýhynda ári qaraı damı beredi dep sanaımyn», - delingen jedelhatta.