Nursultan Nazarbaev ıadrolyq derjavalarmen jaqsy qarym-qatynas ornata bildi - Keı Karasava
Sonymen qatar ıadrolyq qarýy joq Japonııamen de jaqsy qarym-qatynasta. Al bul Nursultan Nazarbaev sııaqty suńǵyla saıasatkerdiń arqasynda qol jetkizilgen úlken jetistik. Rıtsýmeıkan Ýnıversıtetiniń professory, Ekonomıka ǵylymdarynyń doktory, japonııalyq Keı Karasava Elbasy Prezıdenttik ókilettigin toqtatqannan keıin osyndaı pikir bildirdi.
«Men Qazaqstannyń Tuńǵysh Prezıdenti Nursultan Nazarbavtyń otstavkaǵa ketkeni týraly aqparatty «Nıkkeı» gazetiniń tańǵy basylymynan jáne «NHK» jańalyqtarynan kórdim. Eger shynymdy aıtsam, qatty tań qaldym. Árıne, men bul ýaqyttyń keletinin bildim. Biraq, meniń paıymymsha ol áli de eline birshama ýaqyt qyzmet etýi kerek edi.
Osyǵan deıin Nursultan Nazarbaevtyń Qazaqstan halqyna Joldaýyn oqyǵan bolatynmyn. Onda Prezıdent jalpy halyqtyń turmys deńgeıin kóterý máselesin erekshe atap kórsetti. Osy Joldaýǵa men óte tánti boldym. Ásirese, Prezıdenttiń Qazaqstan halqynyń tabysyn ulǵaıtýǵa, eldi baqytty qylýǵa degen umtylysyn erekshe atap ótkim keledi»,-keledi deıdi ǵalym.
Onyń sózinshe, japondyqtar úshin Qazaqstan munaı, tabıǵı gaz sııaqty óziniń baı resýrstarymen, Kaspııdegi qara ýyldyryq beretin balyqtarymen, keń baıtaq jerimen tanymal. Osy keń baıtaq jer Orta Azııanyń kindiginde ornalasyp, Eýropa men Azııany baılanystyratyn erekshe orynda tur. Bul ekonomıkalyq turǵydan eki eldi baılanystyrýǵa úlken múmkindik týǵyzady. Mundaı jaǵdaıda, Qazaqstanǵa keń kólemde ınvestıtsııa salatyn kompanııalar sanynyń kóbeıetini sózsiz. Sonymen qatar, Qazaqstan óziniń resýrstarymen eldiń damýyna úlken serpin berip, tipti dúnıejúzindegi damý protsesterine óz úlesin qosatyndaı áleýeti bar.
«Men aldyńǵy jyldyń qarashasynda Astana klýbynyń shaqyrýymen Qazaqstannyń elordasyna baryp qaıttym. Onda Eýrazııa kontınentiniń ıntegratsııasyna qatysty másele talqyǵa salyndy. Atap aıtqanda, Qıyr Shyǵystaǵy Japonııadan bastap Orta Azııanyń dál ortasyndaǵy Qazaqstan arqyly Eýropaǵa shyǵatyn temirjol tasymalyn damytýǵa kúsh salynyp otyrǵandyǵy jóninde sóz qozǵaldy. Bul ótken jyldan beri óz bastalyp, alǵa jyljyp kele jatqan salalardyń biri. Meniń oıymsha, ekonomıkanyń ártúrli salasy boıynsha yqpaladastyqty damytý qajet. Bul oraıda Qazaqstanda japon kompanııalarynyń belsendiligin odan ári jandandyrý úshin kóptegen jaǵdaılar jasaǵany oryndy bolar edi», - dep qorytady oıyn japonııalyq professor.
