Nursultan Nazarbaev: Túrkistandy tarıhymyzdy pash etetin ortalyq retinde qaldyrýymyz kerek
«Men óńir tarıhynda eń birinshi qala salýǵa kiriskenim – Temirtaý bolatyn. Temirtaýda kombınattyń, partııanyń basshysy bolyp júrgen kezde Máskeýdiń tapsyrmasymen biz qalany qaıtadan quryp, jylyna 80 myń sharshy metr úı, balabaqsha, mektep, aýrýhana salyp, qalany kótergenbiz. Ekinshi úlken qurylys – elordamyz astanany salý boldy. Bul endi batyl sheshim boldy. Bári birdeı oǵan kelisken joq. Qarsy bolǵandar da kóp boldy. Biraq qazir ol sheshimdi bári durys dep sanaıdy. Bul isti atqarý barysynda biz kóp qıyndyq kórdik, ony jurt biledi», - dedi Elbasy «Qazaqstan» ulttyq arnasyndaǵy «Túrkistan: Kóne men keleshek kópiri» derekti fılminde.
Nursultan Nazarbaev bul rette Túrkistannyń tarıhı kelbetin saqtaýǵa basa mán berilgenin atap ótti.
«Árıne, Túrkistandy jańǵyrtqan kezde astananyń qurylysy kóz aldymda turdy. Óziniń qazirgi kelbeti de uqsaıdy. Astanada Aqordadan bylaı qaraı – úlken kóshe. Túrkistanda da oblys ákimdiginiń ǵımaratynan bylaı qaraı júrgen kezde úlken kóshe turady. Ekeýi eki jaqta árıne. Ony elordamen salystyrýǵa bolmaıdy. Biz onyń kelbetin saqtap, eldiń, jurttyń, týrısterdiń baratyn, tarıhymyzdy pash etetin ortalyq retinde qaldyrýymyz kerek», - dedi Nursultan Nazarbaev.