Nursultan Nazarbaev Túrki álemin jaqyndastyrýǵa ólsheýsiz úles qosty
«Nursultan Ábishuly Nazarbaev Qazaqstan Respýblıkasynyń negizin qalaýshy jáne Tuńǵysh Prezıdenti retinde memleketshildiktiń qalyptasýy, Qazaqstannyń óńirde yqpal jáne halyqaralyq arenadaǵy mańyzdy oıynshy qataryna shyǵýyna sheshýshi ról atqardy. Nursultan Nazarbaev memleket basshylyǵynda Qazaqstanda áleýmettik jáne mádenı tutastyq tolyǵymen qalyptasty. Ekonomıkadaǵy aýqymdy ózgeristerdiń arqasynda Qazaqstan óńirdiń mańyzdy ekonomıkalyq jáne energetıkalyq ortalyqtarynyń birine aınaldy. Ult kóshbasshysy retinde Nursultan Nazarbaev kórshi jáne basqa da eldermen beıbit qatar ómir súrý negizinde qarym-qatynastardy jańa deńgeıge kóterip, Qazaqstannyń halyqaralyq arenada rólin arttyrdy. Osyndaı kemeńger ári parasatty saıasaty arqasynda Qazaqstan ósip-órkendegen, beıbitshilik súıgish memleket retinde búkil álemge tanyldy», delingen Bas hatshynyń málimdemesinde.
Sonymen qatar, málimdemede Prezıdent Nursultan Nazarbaev basqarǵan Qazaqstan joǵary deńgeıde halyqaralyq sharalar ótkizgeni aıtylyp, sonyń ishinde EQYU, IKU, ShYU, TMD, Túrki keńesiniń sammıtteri men «Astana protsesi» sııaqty halyqaralyq kezdesýler ótkenine, álemdik deńgeıdegi túrli is-sharalar uıymdastyratyn turaqty jáne senimdi tuǵyrnama retinde óziniń tıimdiligin dáleldegenine nazar aýdarylady. Qazaqstannyń BUU Qaýipsizdik keńesiniń 2017-2018 jyldardaǵy turaqty emes músheligine saılanýy Qazaqstannyń beıbitshilikti saqtaý isine degen búkil álemniń senimin dáleldeıtinin atap ótedi.
«Túrki áleminiń kóshbasshysy retinde Prezıdent Nazarbaev Túrki álemin jaqyndastyrýyna ólsheýsiz úles qosty. Osy oraıda, Túrki kenesi de Prezıdent Nazarbaevtyń tól týyndysy retinde qabyldanady. 2006 jyly ótken Túrkitildes memleketter basshylarynyń sammıti barysynda Prezıdent Nazarbaev Túrkitildes memleketterdiń yntymaqtastyq keńesin (Túrki keńesi) atynda halyqaralyq uıym retinde qurýdy usyndy. Qazirgi ýaqytta Qazaqstan Túrki Akademııasynyń qabyldaýshy el retinde túrki álemindegi tarıhı-mádenı jobalardy damytýda asa mańyzdy ról atqarady. «Rýhanı jańǵyrý» baǵdarlamasy aıasynda jaqynda jaryqqa shyqqan «Uly dalanyń jeti qyry» atty maqalasynda Prezıdent Nazarbaev Qazaqstannyń álemde ózindik ornyn aıqyndaıtyn jáne Túrki dúnıesine aldaǵy kezeńde baǵyt-baǵdar beretin birqatar mańyzdy joba usyndy. Sonymen qatar, qazaq tili álipbıin kırıllıtsadan latyn grafıkasyna kóshirý de túrkitildes memleketterdiń baýyrlas qarym-qatynasyna oń yqpal etedi. Uly kóshbasshy Nursultan Nazarbaevtyń kúsh-jigeri men qajyrly eńbegi árdaıym qazaq halqynyń ǵana emes, Túrki áleminde de tereń qurmet pen rızashylyq sezimderin týdyrady» delingen málimdemede.
