Nursultan Nazarbaev: Tól teńgemiz - memleketimizdiń qalyptasý jolyndaǵy mańyzdy belesterdiń biri
ALMATY. QazAqparat - Búgin Almatyda Qazaqstan qarjygerleriniń ÚІІІ kongresiniń alǵashqy kúni ótip jatyr. Jıynǵa QR Ulttyq bankiniń tóraǵasy Danııar Aqyshev, QR Premer-Mınıstriniń orynbasary Erbolat Dosaev, qazaqstandyq ekinshi deńgeıli bankterdiń, sondaı-aq sheteldik ortalyq bankterdiń basshylary qatysyp jatyr.
QR Premer-Mınıstriniń orynbasary Erbolat Dosaev óz sózin memleket basshysynyń quttyqtaýymen bastady.
«Tól teńgemizdi aınalymǵa engizý - memleketimizdiń qalyptasý jolyndaǵy mańyzdy belesterdiń biri. Teńge óz qarjylyq júıemizdi qalyptastyrýdy, derbes aqsha-nesıe saıasatyn júrgizýimizdi qamtamasyz etti. Sodan beri el ekonomıkasynyń ahýaly aıtarlyqtaı ósti. Shetelden tartylǵan ınvestıtsııalar kólemi - 300 mlrd dollardan, al halyqaralyq qorymyz 86 mlrd dollardan asty. Qazirgi tańda ınstıtýtsıonaldy reformalar júzege asyrylyp keledi. Búginde halyqaralyq qarjy júıesiniń odan ári jetildirý úshin ońtaıly sheshim izdeý qajettiligi týyp otyr. Kongress syndarly oı pikir almasatyn, elimizdiń ál-aýqatyn arttyryp, ornyqty damý úshin memleketter arasynda qarjylyq yntymaqtastyqty nyǵaıtýdyń jańa ádisterin ázirleıtin tıimdi baspasóz alańy bolady dep senemin», - dedi Erbolat Dosaev QR Prezıdenti Nursultan Nazarbaevtyń quttyqtaý sózin oqı kele.
Aıta ketý kerek, búgin Almatyda Qazaqstan qarjygerleriniń VIII kongresi bastaldy. Mańyzdy jıyn tól teńgemizdiń dúnıege kelgenine 25 jyl tolýyna oraı uıymdastyrylyp otyr.
Óz sózinde bas bankır Qazaqstannyń ulttyq valıýtasynyń el ekonomıkasyna yqpaly týraly tilge tıek etti.
Sonymen qatar, Danııar Aqyshev saqtandyrý naryǵynyń bolashaǵy týraly boljamymen bólisti.
