Nursultan Nazarbaev taıaý keleshektegi birqatar zań shyǵarý mindetterin anyqtap berdi
ASTANA. 2 qyrkúıek. QazAqparat - Búgin Memleket basshysy Nursultan Nazarbaev Qazaqstan Respýblıkasy Parlamentiniń besinshi shaqyrylymy úshinshi sessııasynyń ashylýyna qatysty.
Bul týraly Aqordanyń baspasóz qyzmetinen habarlady.
Óz sózinde Memleket basshysy úsh partııaly Parlament Májilisi oń nátıje kórsetkenin jáne búginde partııalyq fraktsııalar yntymaqtastyǵynyńtıimdi tetikteri tolyǵymen qalyptasqanyn atap ótti.
Sonymen qatar, Nursultan Nazarbaev taıaý keleshektegi birqatar zań shyǵarý mindetterin anyqtap berdi.
- Zań shyǵarý protsesiniń basymdyǵy turaqty ekonomıkalyq ósimdi quqyqtyq qamtamasyz etý bolyp qala berýge tıisti. Men jalpyǵa ortaq ekonomıkalyq turaqtylyqtyń jedel oryn alý kezeńin kútip jaıbaraqat júrmeý kerektigin birneshe ret aıtqanmyn. Jańa jahandyq daǵdarystardyń yqtımaldyǵy azaıyp otyrǵan joq. Eksporttyq ónimder men shıkizatqa baǵanyń turaqsyz bolýy - bul uzaq merzimdi úrdis. Tek syrtqy kredıtteýge úmit artý aqyldylyq emes. Sondyqtan barlyq ishki múmkindik pen damý kózderin tolyq iske qosý mańyzdy. Osyǵan baılanysty otandyq bıznes ózin senimdi sezinip, tıimdi damı alatyn orta qalyptastyrý mańyzdy bolyp sanalady. Men Úkimetke Kásipkerlik kodeks jobasyn ázirleýdi tapsyrdym. Onda Qazaqstan kásipkerleri qyzmeti men olardyń memleketpen ózara is-qımylynyń bazalyq qaǵıdattaryn bekitý qajet. Bul «Qazaqstan bıznesiniń konstıtýtsııasy» bolýǵa tıis, - dep atap ótti Memleket basshysy.
Qazaqstan Prezıdenti mańyzdy mindetter retinde barlaýǵa quqyqty usyný júıesin túbegeıli jeńildetý jáne «jemissiz» ken oryndaryna qatysty alypsatarlyq praktıkasyn boldyrmaý úshin «Jer qoınaýy jáne jer qoınaýyn paıdalaný týraly» Zańǵa ózgerister engizýdi de belgilep berdi.
Nursultan Nazarbaev elimizde áleýmettik jańǵyrtýdy odan ári quqyqtyq qamtamasyz etýge nazar aýdardy.
- Bul arada azamattardy, eń aldymen, zeınet jasyndaǵylardy, áleýmettik qamtamasyz etý júıesin reformalaý jónindegi jumysty jandandyrý mańyzdy. Zeınetaqy júıesin reformalaýǵa baılanysty qazaqstandyqtarǵa arnaǵan óz Úndeýimde men Úkimetke azamattardyń zeınetaqy jınaqtary ósiminiń qosymsha kepildikteri týraly birqatar tapsyrmalar berdim. Atap aıtqanda, birinshiden, jumys isteıtin áıelder úshin bala týý jáne bala kútimi boıynsha demalysta bolǵan kezeńinde mindetti zeınetaqy jarnalaryn bıýdjettik qarajat esebinen sýbsıdııalaýdy qamtamasyz etý qajet. Ekinshiden, jumys berýshiler óz jumyskerleriniń zeınetaqy esebine 5 paıyzdyq mindetti qarajat aýdarýdy engizý kerek. Úshinshiden, taǵy 5 paıyzdyq mindetti kásibı jarnalar mólsherlemesin kezeń-kezeńimen arttyrýdy qarastyrǵany jón. Jáne, tórtinshiden, elimizdiń eń perspektıvaly salasyndaǵy zeınetaqy aktıvterin ınvestıtsııalaý tıimdiligin arttyrýdy qamtamasyz etý kerek, - dedi Qazaqstan Prezıdenti.
Memleket basshysy quqyq qorǵaý zańnamasyn jańǵyrtýǵa baılanysty zań shyǵarý bóligindegi mindetterdi atap ótti.
- Parlament aldynda jańa Qylmystyq, Qylmystyq-is júrgizý, Qylmystyq-atqarý kodeksterin, sondaı-aq Ákimshilik quqyq buzýshylyq kodeksi jobalaryn qaraý mindeti tur. Shyn máninde, álemdik tájirıbeni paıdalana otyryp, Qazaqstannyń quqyq qorǵaý jáne sot júıesiniń jańa quqyqtyq negizi qalyptastyrylatyn bolady. Úkimet jáne zań shyǵarýshylar qylmystyq quqyqty izgilendirý úrdisteri men qoǵamda quqyq buzýshylyqqa múlde tózbeýshilikti qalyptastyrý arasynda ortaq vektor ornyqtyrýy mańyzdy, - dedi Nursultan Nazarbaev.
Sońynda Qazaqstan Prezıdenti Qazaqstannyń odan ári damýy men ósip-órkendenýine baǵyttalǵan mańyzdy sheshimder qabyldaýda Parlament pen Úkimet kelisimge kele otyryp, tıimdi qyzmet atqaratynyna senim bildirdi.
