Nursultan Nazarbaev: Taýlar meni ózine tartyp turady

NUR-SULTAN. QazAqparat – Tuńǵysh Prezıdent – Elbasy Nursultan Nazarbaevtyń baspasóz qyzmetiniń YouTube paraqshasynda «Shtrıhı k portretý» derekti fılminiń 1-shi serııasynyń tolyq nusqasy jarııalandy, dep habarlaıdy QazAqparat tilshisi.

«Shtrıhı k portretý» - Nursultan Nazarbaevtyń ómiri men qyzmetine arnalǵan, Qazaqstannyń Tuńǵysh Prezıdenti tulǵasynyń buryn kórermenge belgisiz bolyp kelgen qyrlaryn ashatyn kópserııaly derekti fılm.

«Jyl saıyn ózimniń týǵan jerime baryp turamyn. Ákem men anamnyń basyna baramyn. Úshqońyrǵa shyǵamyn. Búkil ata-babam Úshqońyr jaılaýynda jatyr. Sol jerde otyramyn da, qýat alamyn. Múmkin bolsa qymyz ishem. Men úshin ómirimdegi eń rahat shaǵymnyń biri bul. Bıyl syrqattanyp qalǵan kezimde sol jaqqa arnaıy baryp, 10 shaqty kúndeı sol jaılaýda otyryp, taza aýa jutyp, demaldym. Osylaısha densaýlyǵym qalpyna keldi», - deıdi derekti fılmde Elbasy.

Nursultan Nazarbaev taýda týyp, taýda óskenin esine alady.

«Sondyqtan taýlar meni ózine tartyp turady. Sol taýlarda bir tylsym qýat bar. Balalyq shaǵymnyń, jastyq shaǵymnyń esteligi sonda. Taýlardyń óz keremeti bar. Úırenip qalǵan adamdy taý ózine tartyp turady. Al dalamyzdyń óz kórki bar. Dalaǵa barsań (elordada) aspan alyp bolyp kórinedi. Al Almatyda bıik-bıik taýlardyń ózi kókjıekterdi jaýyp, aspannyń ózi asa alyp kórinbeıdi», - deıdi Nursultan Nazarbaev.

Elbasynyń baspasóz hatshysy Aıdos Úkibaı Twitter -degi paraqshasynda derektiń fılmniń birinshi serııasynyń tolyq nusqasymen bólisti.