Nursultan Nazarbaev Soltústik Koreıa shıelenisin sheshý joldaryn usyndy
NUR-SULTAN. QazAqparat – QR Tuńǵysh Prezıdenti – Elbasy Nursultan Nazarbaev Koreıa Halyqtyq-Demokratııalyq Respýblıkasynyń ıadrolyq qarý shıelenisi týraly pikir bildirdi, dep habarlaıdy QazAqparat tilshisi.
«Bizdi Azııa keńistigindegi mılıtarızatsııa úrdisi, atap aıtqanda Soltústik Koreıa aınalasyndaǵy shıelenis alańdatady. Máseleniń jalǵyz sheshimi – BUU Qaýipsizdik Keńesiniń barlyq qatysýshylary tarapynan Soltústik Koreıa qaýipsizdiginiń pármendi kepildigin jasap shyǵarý dep oılaımyn. Bul Soltústik Koreıany ıadrolyq baǵdarlamasyn toqtata turý jónindegi sáıkes ýaǵdalastyqty tezirek ornatýǵa ıtermeleıdi», - dedi Elbasy Astana club plenarlyq otyrysynyń ashylýynda.
Onyń aıtýynsha, taǵy bir mańyzdy qadam – Phenıan men Seýl arasyndaǵy senim sharalary katalogyn jasaý.
«Bul Koreı túbegindegi jaǵdaıdy turaqtandyrar edi. Atalǵan máselelerdi egjeı-tegjeıli talqylaý úshin AÓSShK (Azııadaǵy ózara yqpaldastyq jáne senim sharalary keńesi) alańyn paıdalanýdy usynamyn», - dedi Nursultan Nazarbaev.
Aıta keteıik, elordada álemniń jetekshi dıplomattary men saıasatkerleriniń jáne sarapshylarynyń basyn qosatyn «Astana klýbynyń» besinshi otyrysy ótýde. Mereıtoılyq otyrys taqyryby «Úlken Eýrazııa: jahandyq yntymaqtastyqtyń jańa qurylymy jolynda» dep atalady. Klýbtyń saraptamalyq talqylaýyna AQSh, Qytaı jáne Reseı arasyndaǵy qyrǵı-qabaqtyń ýshyǵýy, saýda protektsıonızmi men popýlıstik kóńil-kúıdiń artýy, sondaı-aq Iran men Soltústik Koreıa tóńireginde jańa shıelenisterdiń boı kórsetýi máseleleri arqaý bolmaq.
Buǵan deıin Elbasy Eýrazııa qaýipsizdigi boıynsha ózekti máselelerdi atap kórsetken edi.
