Nursultan Nazarbaev Sı Tszınpınniń 5 jyldaǵy jumysyna baǵa berdi
«Tóraǵa Sı Tszınpınmen óte jaqyn tanyspyn. Biz jyl saıyn kezdesip, pikir almasyp otyramyz. Eki elge de tynysh ómir súrýge múmkindik beretin osyndaı senimniń, qarym-qatynastyń bolǵandyǵyn maqtan etemin. Qytaı úlken memleket, al Qytaı Kompartııasynyń 19 sezi bul Qytaı eliniń ishindegi ǵana emes, búkil álemdik mańyzǵa ıe oqıǵa boldy. Sı Tszınpınniń tóraǵalyǵymen tek 5 jyldyń ishinde ǵana ekonomıka 53 trıllıonnan 80 trıllıonǵa deıin ósti. 19 sezde alǵa qoıylǵan ultty damytýdaǵy qytaı armanyna qol jetkizý maqsatynyń barlyq memleketter úshin mańyzy bar», - dedi Elbasy suhbat barysynda.
Osy rette Memleket basshysy Qytaı Halyq Respýblıkasynyń kórshisi, jaqyn dos retinde Qazaqstan bul josparlardyń barlyǵynyń júzege asyrylǵanyn qalaıtyndyǵyn atap ótti.
«Men olardyń júzege asyrylatyndyǵyna senimdimin de. Qytaı ereksheligindegi sotsıalızm bizdiń shyǵystyq dilimizdi, ıdeıalarymyzdy, halqymyzdyń oıyn kórsetedi jáne ol sizderdiń elderińizde óte baıypty ilgeriletilgen. Buǵan qosa, Qytaıdyń ǵylymı-tehnıkalyq progrestegi jetistikterin, álemdegi eń úlken teleskop, eń úlken aerodınamıkalyq qubyr iske qosqanyn, qorǵanys kesheninde de zor jetistigi bar ekendigin aıta alamyn. Munyń barlyǵy da Qytaıdy álemdik saıasattaǵy iri oıynshy, uly derjavaǵa aınaldyrady. Sondyqtan bul máselede, ǵylymı-tehnıkalyq progres máselesinde de biz yntymaqtastyqty belsendi júrgizýdemiz. Qytaı Qazaqstanǵa kómektesip, tehnıkalyq progress úshin mańyzdy nysandardy salýda», - dedi Qazaqstan Prezıdenti.
