Nursultan Nazarbaev ShQO sharýalaryna kooperatsııanyń ne úshin qajet ekenin túsindirdi
ÓSKEMEN. QazAqparat - Nursultan Nazarbaev aýyl sharýashylyǵy kásiporyndarynyń jetekshilerimen kezdesýde Qazaqstanda kóp eńbek atqarylǵanyn, eldiń damyp kele jatqanyn jáne atqarylýy tıis mindetterdiń kóp ekenin atap ótti, dep habarlaıdy QazAqparat.
Prezıdenttiń aıtýynsha, «elimizde qanshama jer bar, al tereń óńdeýdiń bolmaýynan arzan shıkizat satyp otyrmyz».
«Bıdaıdy óńdep, makaron satýǵa bolady. Et, sút, kókónis pen maıly daqyldardy sońyna deıin óńdemeımiz. Elimizde et qombınattary, sút zaýyttary bar, biraq shıkizattyń joqtyǵynan 40 paıyzǵa ǵana jumys istep tur. Bizde shıkizat jeterlik, ony ákelip, ótkizip, ónim úshin aqsha alý kerek. Eger kooperatsııa qursaq, bul júıe retke keledi. Óndirýshiler men tutynýshylardy baılanystyryp turatyn uıym jumys isteıdi», - dep atap ótti Memleket basshysy.
Qazir barsha Qazaqstan arqyly ótetin, Qytaıdy Batys Eýropamen jalǵaıtyn jol qurylysy júrip jatyr. Qazaqstan Prezıdenti atap ótkendeı, bul trassa - shyǵysqazaqstandyq aýyl sharýashylyǵy taýarlaryn óndirýshiler úshin jańa múmkindik. Dál osy jol arqyly fermerler eldiń iri qalalaryna ónim jetkize alady.
Aıta keteıik, búgin Shyǵys Qazaqstanǵa jumys saparymen kelgen Nursultan Nazarbaev Óskemenniń sol jaǵasyndaǵy jańa shaǵynaýdandaǵy jańa «Nurly jol» saıabaǵyn ashyp, Shilikti, Berel qorǵandary men Ablaıkıt býdda ǵıbadathanasynan tabylǵan 2 myń artefakt qoıylǵan arhıtektýralyq kórmeni tamashalady. Sondaı-aq, QR Prezıdenti qala jurtshylyǵymen jáne jańa saıabaqtyń qurylysyna qarjy quıǵan iri óndiristik kásiporyndardyń basshylarymen áńgimelesti.
