Nursultan Nazarbaev Sheteldik ınvestorlar keńesiniń jańa múshelerin tanystyrdy
Osy ýaqyt aralyǵynda kezdesýimiz jaqsy dástúrge aınaldy jáne biz birlesip kóp is atqardyq. Sizder bizdiń ekonomıkamyzdyń qalyptasýyna zor kómek kórsettińizder, qazirgi ýaqytta qolǵa alǵan reformalarymyzdy júrgizdińizder. Bizdiń kezdesýimiz ekonomıkalyq damý turǵysyndaǵy ózekti taqyryptardy talqylaıtyn mańyzdy alańǵa aınaldy. Keńes quramyna elimizdiń jumys istep jatqan iri sheteldik kompanııalardyń ókilderi kiredi», - dep atap ótti keńes jumysyn ashqan Qazaqstan Prezıdenti.
Memleket basshysy keńes quramy jyldan jylǵa sapalyq turǵyda jańaryp otyratyndyǵyn atap ótti.
«Kún tártibine kóshpes buryn men sizderge keńestiń jańa múshelerin tanystyrǵym keledi: Azııa damý bankiniń jeke sektordaǵy operatsııalar jáne teń qarjylandyrý jónindegi vıtse- prezıdenti Dıvakara Gýpta, «Marýbenı korporeıshn» kompanııasynyń Eýropa, Afrıka, TMD elderi boıynsha aǵa óńirlik atqarýshy ofıtseri Naoıa Ivashıta. Olar zeınetkerlikke shyqqan árptesteriniń ornyna kelip otyr. Kadrlyq ózgeristerge baılanysty keńes quramyna Qazaqstan tarabynan jańa músheler kirip otyr. Munan bólek, otyrysqa baıqaýshy kompanııalar da qatysýda», - dedi Nursultan Nazarbaev.
Aıta keteıik, Sheteldik ınvestorlar keńesi Qazaqstan Prezıdenti janyndaǵy keńesshi-konsýltatıvti organ bolyp sanalady. Keńes 1998 jyly eldegi ınvestıtsııalyq qyzmet pen ınvestıtsııalyq ahýaldy jaqsartýmen tikeleı baılanysty ózekti máselelerdi tıimdi sheshý úshin memleket pen sheteldik ınvestorlar arasyndaǵy tikeleı únqatysýdy qamtamasyz etý maqsatynda qurylǵan. Eldiń ınvestıtsııalyq saıasaty men ekonomıkalyq damýynyń basty aspektileri boıynsha Qazaqstan Prezıdenti men Úkimetiniń qaraýyna usynymdar men usynystardy ázirleý Keńestiń basty mindeti sanalady.
