Nursultan Nazarbaev: Shaǵyn ýnıversıtetter QazUÝ-dan qalaı ozyp ketti
Astanada Prezıdent Nursultan Nazarbaevtyń qatysýymen ótip jatqan «Nur Otan» partııasy Saıası keńesiniń keńeıtilgen otyrysynda Ál-Farabı atyndaǵy QazUÝ prorektory Sholpan Jamanbalaeva sóz sóıledi
«JOO-lar «Rýhanı jańǵyrý» baǵdarlamasyna alǵashqylardyń biri bolyp kiristi. Ýnıversıtetter qoǵamdyq sananyń jańǵyrýynda draıver bola bilýi kerek. Biz tek keleshektegi mamandardyń kásibı biliktiligin arttyrýmen shektelmeı, olardy eldiń patrıoty retinde tárbıelep jatyrmyz. Sondyqtan, bizdiń ýnıversıtet arnaıy model jasap shyǵardy», - dedi Sholpan Jamanbalaeva.
Onyń aıtýynsha, Ál-Farabı atyndaǵy Qazaq Ulttyq ýnıversıtetinde jahandyq básekege qabilettilikke jaraıtyn mamandar bilim alyp jatyr. Sondaı oqý ornynda tsıfrlyq kitaphana jumys isteıdi. «Qazaq tilindegi 100 jańa oqýlyq» baǵdarlamasy aıasynda da ýnıversıtettiń oqytýshylary belsene atsalysqan. Sondaı-aq, atalmysh ýnıversıtettiń stýdentteri úshin 1280 oryndyq jataqhananyń qurylysy júrgizilýde.
Prorektordyń sózin tyńdaǵan Prezıdent Nursultan Nazarbaev Ál-Farabı atyndaǵy QazUÝ árdaıym JOO-lardyń aldyńǵy qatarynda júrýi kerektigin atap ótti.
«Sizderdiń ýnıversıtetterińiz árdaıym nómiri birinshi bolatyn. Mine, qazirgi ýaqytta ol osy bıikke saı bolýy kerek. Keıbir pozıtsııa boıynsha qalyp keledi. Ásirese, zamanaýı oqytý, ІT-tehnologııalar men tsıfrlandyrý turǵysynda reıtıng júrgizgenimizde, jeke shaǵyn ýnıversıtetter QazUÝ-dan ozyp ketti. Ókinishti. Sondyqtan, sizdiń qazir aıtyp otyrǵanyńyz óte qanattandyrady. Shynynda da, barlyǵy joǵary oqý oryndarynan bastalýy kerek. Solaı ǵoı. Rektor osy baǵytta mende bolǵan. Búkil ýnıversıtet úlgi kórsete bilýi tıis. Baǵdarlamany qoldańyzdar, al biz sizderdi qoldaıtyn bolamyz», - dedi Nursultan Nazarbaev.
Eske sala ketsek, Astanada búgin Qazaqstan Prezıdenti Nursultan Nazarbaevtyń qatysýymen «Nur Otan» partııasy Saıası keńesiniń keńeıtilgen otyrysy ótip jatyr. Shara barysynda «Nur Otan» partııasyn júıeli túrde jańǵyrtý boıynsha jumys barysy talqylanyp, Qazaqstan Prezıdentiniń bes áleýmettik bastamasyn júzege asyrý baǵytynda qoǵamdyq baqylaýdy uıymdastyrý máseleleri qaralýda.
