Nursultan Nazarbaev Semeı polıgony qalaı jabylǵanyn eske aldy

ALMATY. QazAqparat - Búgin Almatyda ótip jatqan QR Tuńǵysh Prezıdenti Nursultan Nazarbaevtyń saıası kóshbasshylyq fenomenin zertteýge arnalǵan «Kemeńgerliktiń 30 jyly» halyqaralyq ǵylymı konferentsııasynda Elbasy Nursultan Nazarbaev táýelsizdik jyldaryndaǵy eń mańyzdy shara - Semeı polıgonynnyń qalaı jabylǵany týraly aıtyp berdi, dep habarlaıdy QazAqparat tilshisi.

«Qorshaǵan ortany qorǵaý úshin qabyldanǵan eń mańyzdy sharanyń biri - Semeı polıgonyn jabý. Meni birneshe ret Máskeýge shaqyrdy. Gorbachev jáne taǵy basqa tulǵalar «jabýǵa bolmaıdy, taǵy bir 5-6 jaryp óteıik, Amerıkadan qalyp ketemiz» dedi. Osy zalda sol mańyzdy qadamǵa qatysqan birneshe adam otyr. Biz bul máseleni bir jyl talqyladyq. Olar «Semeıdi jarqyratamyz, oblystyń jaǵdaıyn jasaımyz dedi. Biraq, túk bolmaıtynyn men biletinmin. Odaqtyń qaltasynda aqsha joq bolatyn. Men osynda otyryp, Semeı polıgonyn jabý jónindegi jarlyqqa qol qoıdym. Men ol kezde halyqtyń kóńiline, pikirine súıendim. Sol kezde «Nevada-Semeı» degen qozǵalys quryldy. Qarsylyq boldy. Osy qazaq jerin apatqa ushyratqan Semeı polıgony Keńes úkimetiniń áskerı ónerkásiptik kesheniniń úzildi-kesildi qarsylyǵyna qaramastan jabyldy», - dedi N.Nazarbaev.

Eske sala keteıik, búgin Almatyda ótip jatqan «Kemeńgerliktiń 30 jyly» halyqaralyq ǵylymı konferentsııada sóz sóılegen Qasym-Jomart Toqaev Qazaqstan memleketiniń negizin qalaýshy Nursultan Nazarbaevty «egemen eldiń jylnamasyn jazǵan adam» dep atady.

Sondaı-aq, QR Tuńǵysh Prezıdenti Nursultan Nazarbaev óziniń KSRO Úkimetin basqarý týraly usynystan qalaı bas tartqanyn aıtty.