Nursultan Nazarbaev: Prezıdenttiń jumysy - qol qoıý nemese buıryqpen shektelmeıdi
ASTANA. QazAqparat - Qazaqstan Prezıdenti Nursultan Nazarbaev óz jumysyn unatanynyn jáne buǵan qosa kúrdeli ekenin de aıtyp berdi, dep habarlaıdy «QazAqparat» HAA tilshisi.
«Astana» telearnasynyń tilshisi Memleket basshysynyń jumys kestesi tym qaýyrt ekenin, ótken aptada ǵana Prezıdenttiń qatysýymen «EKSPO-2017» kórmesiniń jabylýy, odan keıin IYU sammıtiniń ótkenin, kúnine eki jaqty 8 kezdesýge qatysatynyn aıtyp ótti.
«Osyǵan qaramastan biz sizderdi osynda shaqyrdyq. Joq, azdap demalyp alý úshin», - dep ázildedi Nursultan Nazarbaev.
Prezıdenttiń sózine sáıkes, elge basshy bolý ońaı jumys emes.
«Prezıdenttiń jumysy - qol qoıýmen nemese buıryqpen, zańmen nemese kezdesýlermen shektelmeıdi. Jumystyń 90 protsenti buqaralyq aqparat quraldaryna kórinetin aqparattan tys jatyr. Sizderge aıtarym - bul aýyr jumys. Óz tájirıbeńmen birge, densaýlyqtyń myqtylyǵy men qaırat-jigerdi, psıhologııalyq jáne emotsııalyq qýatty talap etedi. Árıne, óz qalaýyńdaǵy jumys bolǵandyqtan, bul da kómek bola alady. Konfýtsııdiń «Ózińe jaǵatyn jumysty tańdap al - sol kezde ǵana ómir boıy jumys istemeıtin bolasyń» degen sózi bar emes pe. Munda kúndiz-túni tynymsyz eńbek etý kerek. Álbette, ońaı emes. Biraq, men erteńgi kúndi josparlap, ótkizip, sodan keıin keshqurym qýanýdy úırenip qalǵanmyn. Sizder de solaı etińizder», - dedi Memleket basshysy.
