Nursultan Nazarbaev: Prezıdenttik júıeniń arqasynda Qazaqstandy aldyńǵy qatarǵa alyp shyqtyq

«Bizdiń Konstıtýtsııamyzǵa bıyl týra 22 jyl tolady. Konstıtýtsııa da tiri organızm sekildi zamannyń talabyna saı ózgerip turýy kerek. Biz Konstıtýtsııamyzǵa ózgeris engizip, ylǵı da demokratızatsııaǵa qaraı, álemniń barlyǵy ketip bara jatqan jolmen júrip kelemiz. Bári de Parlament men Úkimet úshin, zańnyń ústem bolýyn qamtamasyz etý maqsatynda jasaldy. Demek, kim ne dese de, atalǵan úsh baǵyt demokratızatsııaǵa qaraı jol saldy. Qazaqstannyń basynan ótken aýyrtpalyqty kóp kórdik. Qandaı jolmen júrýdi talqyladyq. Prezıdenttik bılik bizge aýadaı qajet edi. Al ondaı júıe joq elderdiń bárin baıqap kórińiz. Eshkimdi renjitip almaý úshin ol elderdiń atyn ataǵym kelmeıdi. Demek, memleket aıaǵynan tik turyp, táýelsiz ári irgesi berik el bolý úshin eń aldymen óz ishinde bárin tártipke keltirýi kerek. Óz ishindegi turaqtylyqty rettep alǵannan keıin syrtqy elder syılaıtyndaı ekonomıkalyq baza qurylady. Odan keıin syrtqy saıasatty tabysty túrde júrgizýge bolady», - dedi Qazaqstan Prezıdenti.

Nursultan Ábishulynyń aıtýynsha, Qazaqstan «aldymen ekonomıka, keıin saıasat» baǵytyn durys tańdap alǵan.

«Sol kezdegi prezıdenttik júıe ózin-ózi aqtap, Qazaqstandy damýy shaban elderdiń qatarynan alyp shyqtyq. Shyǵys Eýropa nemese Azııa elderinde biz aldyńǵy qatardamyz. Ol sózimizge eshkim de talasa almaıdy. Demek, bunyń bári halyqqa qysym kórsetpegen, saıası turǵyda qýǵyn-súrginge barmaǵan, sóz ben baspasóz bostandyǵyn qamtamasyz etken prezıdenttik júıeniń arqasy edi. Al qazir osy bazanyń negizinde Konstıtýtsııada jazylǵan Prezıdenttiń 35 ókilettiligi Parlament pen Úkimetke berildi. Úshinshiden, zańnyń quzyrlylyǵy úshin osy jyldar boıy kóptegen jumystardy birjaqty ettik. Zańǵa birshama ózgerister engizildi», - deıdi Nursultan Nazarbaev.