Nursultan Nazarbaev pen Djekı Chan ne jaıynda sóılesti

NUR-SULTAN. QazAqparat - QR Prezıdentiniń teleradıo kesheni Elbasy Nursultan Nazarbaevtyń tanymal akter Djekı Chanmen kezdesý týraly vıdeo materıaldy jarııa etti, dep habarlaıdy QazAqparat.

«Bizdiń Qytaı Halyq Respýblıkasymen barlyq baǵyttarda úlken baılanystarymyz bar. Osy jyldardyń ishinde bir-birimizge jaqyn bola tústik. Tóraǵa Sı Tszınpın 6 jyl boıy jumys istep keledi jáne men onymen 20 ret kezdestim. Bizde barlyq másele sheshilgen jáne «Bir beldeý, bir jol» bastamasyn Qazaqstan eń birinshi bolyp qoldap, barlyq qajetti jaǵdaıdy jasady», - dedi Nursultan Nazarbaev.

Elbasy Qazaqstan men Qytaıdyń kınematografısteri birlesip, jumys istep, óner ujymdary arasynda tyǵyz baılanys ornaǵandyǵyn atap ótti. Qytaıdyń joǵary oqý oryndarynda qazaq jastary bilim alyp jatqandyǵyn aıtty.

«Birlesken kásiporyndar quryldy jáne avtomobıl, temir jol, avıatsııalyq qatynastardyń barlyǵy bar. Kontserttik toptar, kórkemóner ujymdary aralasyp turady. Endi ózińizben birlesken kıno túsirmekpiz. Óte mańyzdy», - dep atap ótti QR Tuńǵysh Prezıdenti.

Óz kezeginde Djekı Chan 2017 jyly Qazaqstan elordasynda ótken EKSPO-2017 halyqaralyq kórmesi aıasynda ótken sharalarǵa qatysqanyn aıtty.

«Elge oralǵannan keıin qandaı baǵytta yntymaqtastyqty jolǵa qoıa alatyndyǵymyzdy uzaq oılandym. Al bıyl birlesken fılm túsirýge bastamashylyq jasadym. Múddeli organdardyń tarapynan qoldaý alatyndyǵymyzǵa úmittenemiz. Bul bizdiń mádenıet salasyndaǵy yntymaqtastyǵymyzdyń alǵashqy qadamy bolmaq»,-dedi tanymal akter.

Buǵan deıin Elbasy Nursultan Nazarbaev Qytaıda belgili akter Djekı Chanmen kezdeskenin habarlaǵan edik.