Nursultan Nazarbaev óziniń esimin Astanaǵa berý usynysyna qatysty pikirin bildirdi
ASTANA. QazAqparat - Búgin otandyq telearnalardan kórsetilgen respýblıkalyq BAQ ókilderine suhbaty barysynda QR Prezıdenti Nursultan Nazarbaev óziniń esimin Astanaǵa berý usynysyna qatysty pikirin bildirdi, dep habarlaıdy QazAqparat.
Suhbat barysynda «Qazaqstan» telearnasy «Aıtýǵa ońaı» baǵdarlamasynyń júrgizýshisi Beısen Quranbek Elbasynan: «Táýelsiz Qazaqstannyń negizin qalaýshy, elordamyzdyń bas arhıtektory deıdi. Ol bultartpas shyndyq. Ony eshkim de joqqa shyǵara almaıdy. Osy oraıda, áriptesimniń sózin tolyqtyra ketetin suraq bar. Astanaǵa atyńyzdy bersek deıdi. Men Astanada uzaq jyl turdym, qyzmet istedim. Jýrnalıst retinde qasyńyzda júrip, kóp ǵımarattyń ashylýyna qatystym. Keshe áriptesterimmen otyrǵanda keıbir nysandardyń qurylysy qalaı bastalyp, qaısysy buryn salynǵanyn umytyp qalyppyn. Sizdiń esińizde me?», -dep surady.
«Seniń balalaryń endi qalaı esinde saqtaıdy? Solarǵa sen aıtyp otyrmasań. Astanaǵa meniń atymdy berý, basqalary da anaý kúni Parlamentte aıtyldy. Konstıtýtsııaǵa ózgerister engizgen kezde de aıtty. Meniń istegen eńbegimdi atap jatyr. Adam retinde maǵan, árıne kóńilime jaǵady. Biraq, el basqaryp otyrǵannan keıin tek qana maǵan jaǵady degen jaǵdaımen júrmeý kerek. Qazir Astana - álemdik brend», - dedi Nursultan Nazarbaev.
Sonymen qatar Elbasy búgingi kúni elordamyzda Sırııa problemasyna qatysty kelissózderdiń jáne basqa da halyqaralyq jıyndardyń ótetin ornyna aınalǵanyn basa atap ótti.
