Nursultan Nazarbaev: Osynsha ýaqyt basshylyqta ustaǵandaryńyz úshin alǵys aıtamyn

NUR-SULTAN. QazAqparat - QR Tuńǵysh Prezıdenti - Elbasy Nursultan Nazarbaev partııalyq qyzmetke qalaı kelgenin eske aldy, dep habarlaıdy QazAqparat tilshisi.

«Maýsym aıynda Qazaqstannyń Kommýnıstik partııasynyń birinshi hatshysy qyzmetine kelgenime 30 jyl tolady. Bul kóshbasshylyq pozıtsııa edi. Ol kezde atalǵan qyzmet «Qazaqstannyń birinshi jetekshisi» dep atalatyn. Alasapyran kezeń boldy. Bir jyldan keıin bárimiz ómir súrgen memleket ydyrap ketti. Tóbemiz jerge túskendeı boldy. Bári abdyrap, ne isterin bilmedi. Sodan beri 30 jyl da ótti», - dedi «Nur Otan» partııasynyń Tóraǵasy N.Nazarbaev partııanyń kezekten tys XIX sezinde.

Elbasy partııanyń búgingi sezinde dál sol kezeńdi eske alǵanyn jetkizdi. Keńes odaǵy ydyrap ketkende alda ne bolatynyn eshkim bilmedi. «Sonda meniń Qazaqstandy jan-jaqty bilgenim bar. Al 1984 jyly 20 naýryzda meni Qazaqstan Úkimetiniń tóraǵasy qyzmetine saılaǵan bolatyn. Mine, sodan beri 35 jyl ótti. Osyndaı úlken shydamdylyq úshin, meni osynshama ýaqyt basshylyqta ustaǵany úshin zor alǵysymdy bildiremin. Osy ýaqyttyń ishinde halqymnyń senimin aqtasam, men - baqytty adammyn, baqytty saıasatkermin», - dep atap kórsetti N.Nazarbaev.

Aıta keteıik, búgin Elbasy «Nur Otan» partııasynan QR Prezıdenttigine úmitker retinde Qasym-Jomart Toqaevtyń kandıdatýrasyn usyndy. Budan bólek, Nursultan Nazarbaev partııanyń kandıdatyn qoldaýǵa qatysty birqatar tapsyrmalar berdi. «Nur Otan» sezi Qasym-Jomart Toqaevtyń kandıdatýrasyn biraýyzdan bekitti.