Nursultan Nazarbaev ortalyǵy men QR Ulttyq mýzeıi memorandýmǵa qol qoıdy

Mádenı, rýhanı, órkenıetaralyq, dinaralyq dıalog pen kelisim salasyndaǵy áriptestikti nyǵaıtý maqsatynda 2021 jyldyń 2 sáýirde Konfessııaaralyq jáne órkenıetaralyq dıalogty damytý jónindegi Nursultan Nazarbaev ortalyǵynyń Basqarma Tóraǵasy Bolat Sársenbaev pen Qazaqstan Respýblıkasy Ulttyq mýzeıiniń dırektory Arystanbek Muhamedıuly ózara yntymaqtastyq týraly memorandýmǵa qol qoıdy.

Taraptar jalpy rýhanı qundylyqtarǵa súıene otyryp, Qazaqstan Respýblıkasynyń Tuńǵysh Prezıdenti, Elbasy N.Nazarbaevtyń bastamasymen jáne Qazaqstan Respýblıkasynyń Prezıdenti Q.K.Toqaevtyń qoldaýymen Álemdik jáne dástúrli dinder lıderleri Seziniń ıdeıalaryn is júzinde ilgeriletý úshin seriktestikti damytýǵa nıetti. Sonymen qatar, Qazaq halqynyń rýhanı jáne tarıhı muralaryn nyǵaıtýǵa baǵyttalǵan ǵylymı jáne mádenı-aǵartý jobalaryn, murajaı kórmelerin, ekspozıtsııalaryn, ekskýrsııalaryn, sondaı-aq, halyqaralyq jáne aımaqtyq qaýipsizdik salasyndaǵy Qazaqstan Respýblıkasynyń syrtqy saıası bastamalaryn damytýǵa ýaǵdalasty.

Memorandým aıasynda Qazaqstandaǵy dinder tarıhy, álemdik ıslam tarıhy jáne basqa konfessııalar týraly arnaıy taqyryptyq kórme, birlesken jobalar, konsýltatsııalar, dinaralyq jáne konfessııaaralyq dıalog, teologııa, tarıh, óner, mýzeı salasyndaǵy halyqaralyq, respýblıkalyq konferentsııalar, semınarlar men sımpozıýmdar, sondaı-aq N.Nazarbaev ortalyǵynyń seriktesterin, sheteldik qonaqtardy Qazaqstan Respýblıkasy Táýelsizdiginiń 30 jyldyǵyna arnalǵan taqyryptyq kórmelermen tanystyrý jumystary júzege aspaqshy.

Júıelik negizde ǵylymı aqparat, saraptamalyq, tarıhı materıaldarmen, sondaı-aq ádebıet, bıblıografııalyq basylymdarmen almasý josparlanýda.

Memorandýmǵa qol qoıý barysynda N.Nazarbaev ortalyǵynyń Basqarma Tóraǵasy Bolat Sársenbaev eldiń ótkeni, búgini men bolashaǵy eń aldymen ult birligimen ólshenetinin, qazaq halqy óz jerinde 130-dan astam ult pen ulys ókilderin qabyldap, 18 konfessııanyń ortaq úıine aınalǵanyn aıtty.

«Qazaqstan búginde qoǵamdyq kelisim men ulttyq birliktiń álemdik modeline aınaldy dep aıtýǵa negiz bar. Toleranttylyq, kez-kelgen konfessııanyń ókilderine qurmetpen qaraý, dinder, konfessııaaralyq dıalog pen Qazaqstan aýmaǵynda kelisimdi damytý - bul Táýelsizdiktiń 30 jylynda jetken eń úlken jetistikterdiń biri. Bul baǵytta álemde konfessııaaralyq, órkenıetaralyq dıalogty saqtaýǵa jáne qamtamasyz etýge baǵyttalǵan Álemdik jáne dástúrli dinder lıderleri Seziniń, sondaı-aq Qazaqstan halqy Assambleıasynyń mańyzdy rólin atap ótken jón. Qazirgi ýaqytta Ulttyq mýzeı Qazaqstannyń tarıhı-mádenı murasyn saqtaýda erekshe oryn alady. Qazaqstan tarıhynyń shejiresin tereń bilýge ​​yqpal etetin biregeı týyndylardyń jas urpaq úshin mańyzy zor dep senimmen aıta alamyz. Yntymaqtastyq týraly memorandýmǵa qol qoıý arqyly biz toleranttylyq ıdeıalaryn ilgeriletýge, dinder arasyndaǵy dıalog pen shyǵarmashylyqty damytýǵa zor úles qosatynymyzǵa senimdimin», - dedi óz sózinde Bolat Sársenbaev.

Óz kezeginde Qazaqstan Respýblıkasy Ulttyq mýzeıiniń dırektory Arystanbek Muhamedıuly Álemdik jáne dástúrli dinder lıderleri Seziniń aımaqtyq jáne halyqaralyq deńgeıde, Táýelsizdiktiń 30 jylyndaǵy Qazaqstan tarıhyn keńinen nasıhattaýǵa, jalpyadamzattyq jáne rýhanı qundylyqtardy nyǵaıtý boıynsha maqsatty jobalardy júzege asyrýǵa daıyn ekendigin bildirdi.